SİYASƏT
Qırğızıstan Azərbaycanın Diasporla İş üzrə Dövlət Komitəsinin təcrübəsini öyrənir
Komitədən AZƏRTAC-a bildiriblər ki, görüşdə müxtəlif ölkələrdə Azərbaycan və qırğız diasporunun birgə fəaliyyəti, Diasporla İş üzrə Dövlət Komitəsinin təcrübəsinin öyrənilməsi, Qırğızıstandakı Azərbaycan diasporunun problemləri müzakirə olunub.
Nazim İbrahimov Azərbaycanın diaspor quruculuğu, Diasporla İş üzrə Dövlət Komitəsinin yaradılması, fəaliyyəti və əldə olunmuş uğurlar haqqında məlumat verib. Bildirilib ki, diaspor və lobbiçilik Azərbaycanın xarici siyasətində prioritet istiqamətlərdəndir və dövlətin bu sahəyə dəstəyi sayəsində dünya ölkələrindəki azərbaycanlıların təşkilatlanmasına, digər xalqların diaspor təşkilatları ilə sıx əlaqələrin qurulmasına və müxtəlif uğurlara imza atılıb. N.İbrahimov türkdilli ölkələrin diaspor təşkilatlarının birgə fəaliyyət proqramı çərçivəsində Azərbaycan və qırğız diasporunun daha sıx əməkdaşlıq etməsinin vacibliyini qeyd edib, bu istiqamətdə Azərbaycan diasporunun hər bir yardıma hazır olduğunu vurğulayıb. Dövlət Komitəsinin sədri xüsusilə dünyada cərəyan edən qlobal proseslər fonunda türkdilli xalqların diasporunun birgə fəaliyyətinin, Türkdilli Dövlətlərin Əməkdaşlıq Şurasına üzv ölkələrin diaspor təşkilatlarının ortaq fəaliyyət strategiyasından irəli gələn vəzifələrin həyata keçirilməsinin zəruri olduğunu diqqətə çatdırıb.
“Qırğızıstan Xalqı Assambleyası” Assosiasiyasının sədri Bektemir Murzubraimov rəhbərlik etdiyi təşkilat haqqında məlumat verərək bildirib ki, Assosiasiya Qırğızıstanda mövcud olan 130-dan artıq azsaylı xalqın cəmiyyətlərini, o cümlədən “Azəri” Azərbaycan təşkilatını özündə birləşdirir. B.Murzubraimov dünyanın müxtəlif ölkələrində yaşayan qırğızlarla işləyəcək dövlət qurumunun yaradılması planları ilə bağlı Azərbaycanın Diasporla İş üzrə Dövlət Komitəsinin təcrübəsini öyrənmək və tətbiq etmək niyyətində olduqlarını deyib.
Azərbaycanın lobbiçilik fəaliyyətində ciddi uğurlara imza atdığını vurğulayan Nazim İbrahimov həm bu, həm də diaspor quruculuğu sahəsində qazanılmış təcrübəni qırğız həmkarları ilə bölüşməyə və lazımi dəstək göstərməyə hazır olduğunu bildirib. O deyib ki, indiyədək bir çox xalqlar Dövlət Komitəsinin təcrübəsindən yararlanaraq öz ölkəsində oxşar qurumun yaradılmasına nail olublar.
Görüşdə Qırğızıstandakı Azərbaycan diasporunun fəaliyyəti də müzakirə olunub. B.Murzubraimov bildirib ki, bu ölkədə yaşayan 20 min azərbaycanlı əsasən cəmiyyətin ziyalı təbəqəsini təşkil edir və ölkənin ictimai-siyasi həyatında mühüm rol oynayır. O qeyd edib ki, hazırda Qırğızıstanda yaşayan azərbaycanlılar arasında onlarla alim, müxtəlif fəxri adlara layiq görülmüş ixtisas sahibləri var.
Söhbət zamanı Qırğızıstandakı diaspor təşkilatlarına, eləcə də diasporun fəal üzvlərinə dəstək göstərilməsi ilə bağlı fikir mübadiləsi aparılıb.
Qırğızıstanın Azərbaycandakı müvəqqəti işlər vəkili Ayciqit Buranov isə yaxın vaxtlarda açılacaq Bakı-Bişkek-Bakı birbaşa təyyarə reysinin iki ölkə arasında müxtəlif sahələrdə, eləcə də diaspor sahəsində əlaqələrin möhkəmlənməsində mühüm rol oynayacağını bildirib.