Qızılın qiyməti son 6 həftədə ən böyük itkiyə hazırlaşır
Bakı, 17 iyul, AZƏRTAC
Qlobal qeyri-müəyyənliklər fonunda qızılın qiymətinə təzyiq davam edir və qiymətli metal həftəni itki ilə tamamlamağa yönəlib.
AZƏRTAC xəbər verir ki, qızılın qiyməti həftə ərzində təxminən 3,2 faiz ucuzlaşıb və son 6 həftədə - iyunun 1-dən bəri ən kəskin həftəlik enişə hazırlaşır. Hazırda Nyu-Yorkun COMEX əmtəə birjasında qızılın bir troya unsiyasının qiyməti 3990 dollar civarındadır.
Qiymətli metal cari ilin ikinci rübündə 14 faiz dəyər itirib və bu, 2013-cü ildən bəri ən pis rüblük göstəricidir.
Ekspertlərin fikrincə, ABŞ və İran münaqişəsi neft qiymətlərini artırır, inflyasiya və faiz dərəcələrinin artırılması gözləntilərini gücləndirir və qızıla aşağıistiqamətli təzyiq göstərir. Yaxın Şərqdə geosiyasi risklər davam etdiyi üçün inflyasiya və istiqraz gəlirləri ilə bağlı narahatlıqlar qızılın qiymətinə təsir edən əsas amillər olaraq qalır.
Qızıl ənənəvi olaraq inflyasiyaya qarşı hedcinq kimi qəbul edilsə də, yüksək faiz dərəcəsi mühitində cəlbediciliyini itirir, çünki heç bir gəlir gətirmir.
Bölmənin digər xəbərləri
