Quba Soyqırımı Memorial Kompleksi ziyarət edilmişdir
Bakı, 31 mart (AZƏRTAC). Martın 31-də Azərbaycan Yazıçılar Birliyinin (AYB) Gənclər Şurasının üzvləri Quba Soyqırımı Memorial Kompleksini ziyarət etmişlər.
AZƏRTAC-a xəbər verir ki, gənclər soyqırımı qurbanlarının xatirəsinə ehtiramlarını bildirmişlər.
Bildirilmişdir ki, Quba soyqırımı məzarlığı 2007-ci il aprelin 1-də ərazidə torpaq işləri görülərkən aşkar edilmişdir. 2009-cu ildə Nazirlər Kabinetinin sərəncamı ilə “Quba rayonunda kütləvi qətl qurbanlarının xatirəsinin əbədiləşdirilməsinə dair tədbirlər planı” təsdiq edilmiş, aşkar olunmuş kütləvi məzarlığın yerləşdiyi ərazidə monumental xatirə kompleksinin ucaldılması və abadlıq işlərinin aparılması qərara alınmışdır. 2007-ci ilin iyulundan etibarən Azərbaycan Milli Elmlər Akademiyasının Arxeologiya və Etnoqrafiya İnstitutunun əməkdaşları tərəfindən kütləvi məzarlıqda geniş tədqiqat işlərinə başlanılmış, 2008-ci ilin sentyabrında isə tədqiqat işləri başa çatdırılmışdır. Tədqiqatlar nəticəsində məzarlığın 1918-ci ildə ermənilərin yerli dinc əhaliyə qarşı törətdikləri soyqırımı ilə bağlı olduğu müəyyən edilmişdir.
Tanışlıqdan sonra Gənclər Şurasının sədri Elşad Ərşadoğlu bu məzarlığın erməni vəhşilərinin iç üzünün dünyaya tanıdılması üçün canlı nümunə olduğunu bildirmiş, bu həqiqətlərin dünyaya çatdırılmasında gənc yazıçıların üzərinə düşən vəzifələrdən danışmışdır.
Bölmənin digər xəbərləri
