Quba soyqırımı məzarlığı düşmənin nə qədər məkrli olduğunun sübutudur
Quba, 31 mart, Elxan Yusifli, AZƏRTAC
Erməni şovinistləri əllərinə düşən hər fürsətdə azərbaycanlılara qarşı soyqırımı törədiblər. Azərbaycanın bir çox yerlərində bu soyqırımlarının nişanələri var. Quba soyqırımı məzarlığı düşmənin nə qədər məkrli olduğunun sübutudur. Ermənilərə qarşı daim humanist münasibət göstərib, onları himayə etsək də, əvəzində hər fürsətdə bizi arxadan vurublar. Onlar azərbaycanlılara, türklərə qarşı tarixi düşmənçilik siyasəti aparıb və həmişə amansız, qəddar olublar.
Bu sözləri Quba Soyqırımı Memorial Kompleksini və ərazidəki kütləvi məzarlığı ziyarəti zamanı AZƏRTAC-a müsahibəsində Qarabağ Azadlıq Təşkilatının sədri Akif Nağı söyləyib.
O qeyd edib ki, dünya tarixində dinc əhaliyə qarşı ən amansız davranan ermənilər olub. 1918-ci il martın 30-u gecə saatlarında Bakıda başlanan kütləvi qırğınlar 20 minə yaxın günahsız insanın, o cümlədən çoxlu sayda qoca, qadın və uşağın qətli ilə nəticələnib. Ermənilərin azərbaycanlılara qarşı məkrli siyasəti bu gün də davam edir. Qarabağ müharibəsi dövründə onlar Xocalıda, Ağdabanda, Meşəlidə də dinc əhaliyə amansız divan tutublar.
“Biz bu gün Quba soyqırımı məzarlığını Qarabağ qaziləri, müharibə veteranları və ziyalılarla birlikdə ziyarət etdik. İstəyirik ki, bütün dünya ictimaiyyəti bir çox dövlətlər tərəfindən himayə olunan Ermənistanın iç üzünü görsün. Torpaqlarımızın işğalda qalmasına yardımçı olan dövlətlər bu faktları araşdırmalı və Azərbaycanın haqq səsinə səs verməlidirlər”, - deyə A.Nağı vurğulayıb.
Bölmənin digər xəbərləri
