Qusarda özünüməşğulluq proqramı çərçivəsində 87 ailə təsərrüfatı yaradılıb
Qusar, 26 fevral, Elxan Yusifli, AZƏRTAC
Ötən il Qusarda özünüməşğulluq proqramı çərçivəsində 87 ailə dövlət dəstəyindən faydalanıb.
AZƏRTAC-ın bölgə müxbiri xəbər verir ki, əhalinin özünüməşğulluğunun təmin olunması ilə bağlı proqrama rayon üzrə 98 ailə cəlb olunub. Onlardan 87 ailənin kiçik biznes layihələri uğurlu hesab edilib.
Bunlardan 53 ailə 142 baş iribuynuzlu, 8 ailə 168 baş xırdabuynuzlu heyvanlarla, 1 ailə isə gözəllik salonu açmaq üçün lazımi avadanlıqlarla təmin olunub.
Tezliklə daha 25 ailəyə kiçik biznesin qurulması üçün lazım olan aktivlərin verilməsi nəzərdə tutulur. Bununla da rayonda proqram çərçivəsində dövlət dəstəyindən faydalanan ailələrin sayı 112-yə çatacaq.
Proqrama cəlb edilən işsiz və işaxtaranlar sırasında əlilliyi olanlara, aztəminatlı, çoxuşaqlı, şəhid, məcburi köçkün, ünvanlı dövlət sosial yardımı alan ailələrin üzvlərinə, penitensiar müəssisələrdə cəza çəkməkdən azad olunanlara və digər həssas qruplara üstünlük verilir.
Bölmənin digər xəbərləri
