Qusarın “Şahdağ” futbol klubunun baş məşqçisi istefa verib
Qusar, 15 oktyabr, Elxan Yusifli, AZƏRTAC
Futbol üzrə Azərbaycan I divizionunda mübarizə aparan Qusarın “Şahdağ” futbol klubunun baş məşqçisi Telman Cavadov istefa verib.
AZƏRTAC xəbər verir ki, istefaya komandanın I divizionunda, eləcə də Azərbaycan Kuboku yarışlarında uğursuz çıxışı səbəb olub.
“Şahdağ” kubok uğrunda mübarizəni doğma meydanda “Şəmkir” kollektivinə 1-3 hesabı ilə uduzduqdan sonra 1/16 final mərhələsində dayandırıb. Azərbaycan I divizionunda isə beş oyundan sonra cəmi bir xal toplayan klub sonuncu pillələrdə qərarlaşıb.
Klubun mətbuat xidmətinin rəhbəri Rüstəm Əzimov AZƏRTAC-a bildirib ki, yeni baş məşqçisinin adı bu gün keçirilən iclasdan sonra məlum olacaq.
“Şahdağ” futbol klubunun baş məşqçisi postundan istefa verən Telman Cavadov bundan sonra komandanın aşağı yaş qruplarını çalışdıracaq.
Bölmənin digər xəbərləri
