QUŞÇULUQ MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, iyulun 20-də Bakı şəhərinin “Təzə bazar”, 3-cü mikrorayon, Sabunçu və Badamdar bazarlarında quşçuluq məhsullarının növbəti satış-yarmarkaları keçirilmişdir.
İqtisadi İnkişaf Nazirliyi və Quşçular Cəmiyyətinin birgə təşkil etdikləri yarmarkalarda alıcılara keyfiyyətli, bazar qiymətlərindən ucuz toyuq əti və yumurta təklif olunmuşdur. “Təzə bazar” MMC-nin ərazisindəki yarmarkada Hacıqabul, İmişli, Goradil, Hövsan, Giləzi və digər quşçuluq fabriklərindən gətirilmiş məhsullar satılmışdır.
İmişli broyler fabrikinin işçisi Faiq Əhmədov gətirdiyi toyuq ətinin kiloqramını növlərinə görə 2 manata, 2 manat 40 qəpiyə, 2 manat 60 qəpiyə, içalatı isə 2 manata satırdı. Paytaxt sakini Şükür Məmmədov hər həftə buradan yumurta və toyuq əti aldığını, məhsulların keyfiyyətli və bazardakından xeyli ucuz olduğunu bildirdi. Hövsan quşçuluq fabrikindən Pərvin Budaqov isə toyuq ətini 2 manat 40 qəpiyə satırdı. Digər alıcı - Əhmədağa Cəbrayılov da yarmarkaların təşkilindən razılıq edirdi.
Giləzi quşçuluq şirkətinin işçiləri Sabir Qarayev, Əsrayıl İsmayılov 9 min ədəd yumurtanın birini 8-9 qəpiyə, qəfəsini (30 ədəd) isə 2 manat 70 qəpiyə satırdılar. Goradil fabrikindən Elvin İgidov 5400 ədəd yumurtanın birini 9 qəpiyə, qəfəsini isə 2 manat 70 qəpiyə verirdi.
İqtisadi İnkişaf Nazirliyi mətbuat xidmətinin rəhbəri Abbas Əliyev bildirdi ki, bu gün şəhərin yarmarkalarında satışa 20 ton toyuq əti və 500 minə yaxın yumurta çıxarılmışdır.
Bölmənin digər xəbərləri
