QUŞÇULUQ MƏHSULLARININ NÖVBƏTİ SATIŞ-YARMARKALARI KEÇİRİLMİŞDİR
AZƏRTAC xəbər verir ki, iyulun 27-də Bakı şəhərinin “Təzə bazar”, Nəsimi, 3-cü mikrorayon, Sabunçu və Badamdar bazarlarında quşçuluq məhsullarının növbəti satış-yarmarkaları keçirilmişdir.
İqtisadi İnkişaf Nazirliyi və Quşçular Cəmiyyətinin birgə təşkil etdikləri yarmarkalarda alıcılara keyfiyyətli, bazar qiymətlərindən ucuz toyuq əti və yumurta təklif olunmuşdur. “Təzə bazar” MMC-nin ərazisindəki yarmarkada Hacıqabul, İmişli, Goradil, Hövsan, Giləzi və digər quşçuluq fabriklərindən gətirilmiş məhsullar satılmışdır.
Mərdəkan broyler fabrikinin işçisi Savalan Zakir bu gün satışa 150 kiloqram toyuq əti gətirdiyini demişdir. Havaların isti keçməsi və məhsul bolluğu ilə əlaqədar qiymətləri aşağı saldıqlarını deyən İmişli broyler fabrikinin işçisi Faiq Əhmədov gətirdiyi toyuq ətinin kiloqramını növlərinə görə 2 manat 50 qəpiyə, 2 manat 60 qəpiyə, içalatı isə 2 manata satdığını bildirmişdir. Paytaxt sakini, təqaüdçü İltifat Cəfərov mövsüm ilə əlaqədar qiymətlərin daha da aşağı salınmasını təklif etmişdir. Hövsan broyler fabrikindən Səfər Rəşidov isə toyuq ətini 2 manat 40 qəpiyə satmışdır.
Giləzi quşçuluq şirkətindən Sabir Qarayev yarmarkaya gətirdiyi 12 min ədəd yumurtanı növlərinə görə birini 7, 8, 9 və 10 qəpiyə satmışdır. Alıcılar isə məhsulların keyfiyyətli və bazardakından xeyli ucuz olduğunu bildirmişlər.
İqtisadi İnkişaf Nazirliyinin mətbuat xidmətindən verilən məlumatda bildirilir ki, cümə günü şəhərin yarmarkalarında satışa 20 tona yaxın toyuq əti və 500 min ədəd yumurta çıxarılmışdır.
Bölmənin digər xəbərləri
