Ramana qəsəbə sakini evinin çardağında aşkarladığı silah-sursatı polisə təhvil verib
Bakı, 27 fevral, AZƏRTAC
Qanunsuz saxlanılan silah-sursatın könüllü təhvil verilməsi məqsədilə polis əməkdaşlarının keçirdikləri əməliyyat və profilaktiki tədbirlər səmərəli nəticələr verir.
Daxili İşlər Nazirliyinin mətbuat xidmətindən AZƏRTAC-a bildiriblər ki, Sabunçu Rayon Polis İdarəsinin 12-ci polis şöbəsinə müraciət edən Ramana qəsəbəsinin qadın sakini evinin çardağında mərhum qardaşına məxsus silah-sursat aşkarladığını və onları könüllü olaraq polisə təhvil vermək istədiyini qeyd edib.
Həmin ünvana gələn polis əməkdaşları iki ədəd “F-1” qumbarası, 2 alışdırıcı, 64 avtomat patronu, 2 patron darağı, 2 siqnal fişəngi və 1 silah təmizləmə ləvazimatı aşkarlayıblar. Həmin silah-sursat götürülərək aidiyyəti üzrə təhvil verilib.
Bölmənin digər xəbərləri
