RAYON AĞSAQQALI MİRZƏLİ CƏFƏROVUN ÇIXIŞI
-Cənab Prezident!
İcazə verin, bütün yardımlılılar adından, o cümlədən ziyalılar və ağsaqqallar adından, çoxsaylı Yardımlı gəncləri adından Sizə “Xoş gəlmisiniz!” deyim, qədəmləriniz mübarək olsun. Rəhmətlik Heydər Əliyev hələ 1964-cü ilin oktyabr ayında Yardımlıya xoş bir müjdəni yerinə yetirmək üçün gəlmişdi. Bu gün Siz buradasınız, bizimləsiniz. Həyatımızın elə bir sahəsi yoxdur ki, Heydər Əliyev dühası oraya nüfuz etməmiş olsun. Məncə, Heydər Əliyevin ən böyük xidmətlərindən biri Sizin kimi dünya şöhrətli, ən görkəmli bir insanı Azərbaycan xalqına bəxş etməsidir.
Cənab Prezident, 2003-cü il oktyabrın 1-də Heydər Əliyevin Azərbaycan xalqına müraciətində deyilirdi: “İlham Əliyev praqmatik düşüncəli, yüksək ideyalı, mənim qurub başa çatdıra bilmədiyim ən çətin işləri axıra çatdıra biləcək bir şəxsiyyətdir. Mən ona özüm qədər inanıram”. Xalq bu müdrik sözləri, nəsihətləri qəbul elədi və Sizə səs verdi, Sizi Prezident seçdi. O vaxt yardımlılıların 79 faizi Sizə səs vermişdi. Sizin Prezident seçildikdən az sonra təsdiq etdiyiniz regionların sosial-iqtisadi inkişafı üzrə Dövlət proqramı ulu öndərin bütün arzularının həyata keçirilməsinə kömək etdi.
Cənab Prezident, ulu öndər Heydər Əliyev məktəbliləri sevirdi və hesab edirdi ki, gələcəkdə Azərbaycanın ən mühüm işlərinin ağırlığını uşaqlar öz çiyinlərində aparacaqlar. Bu sahədə möhtərəm Mehriban xanım Əliyevanın işləri çox böyükdür. O, Azərbaycanda bu sahədə Heydər Əliyev ideyalarının həyata keçirilməsində, xalqa xidmətdə nümunə göstərir. Respublikada tikilən 132 məktəbdən 6-sı rayonumuzda qısa vaxt ərzində tikilib bütün avadanlığı, təchizatı ilə istifadəyə verilmişdir.
Cənab Prezident, Siz həmişə xalqla birlikdə olmusunuz. Bütün bunlar bizim qəlbimizi riqqətə gətirir. Xalqla rəhbərin vəhdətinin nə demək olduğunu göstərir. Biz qarşıdakı seçkilərdə də, sonrakı seçkilərdə də bütünlüklə Sizinlə xalqın vəhdətinə, Heydər Əliyev ideyalarının həyata keçməsinə səs verəcəyik.
Cənab Prezident, Prezident kimi çətin, məsul, şərəfli bir vəzifənin öhdəsindən layiqincə gəlmək üçün Sizə Ulu Tanrıdan uzun ömür, cansağlığı arzu edir, bütün yardımlılılar və onların burada iştirak edən nümayəndələri adından uğurlar diləyirəm.
Cənab Prezident, ola bilməz ki, sazı-sözü olan bir region şairi Sizi şeirə qonaq etməsin.
Böyük Heydər olsun balaca Heydər,
Yetdi, kömək etdi ən çətin anda,
Bu odlar yurdunun ahı Heydərə.
Yenidən yaratdı, yenidən qurdu,
Dedilər dünyanın şahı, Heydərə.
Nadanlar susadı xalqın ətinə,
Xalq od ayaqladı düşdü çətinə,
Heydər kömək oldu öz millətinə,
Onunçün dedilər dahi, Heydərə.
Böyük Heydər olsun, balaca Heydər,
Heydərlər yetirsin dalınca Heydər,
Tanrı qismət etsin, ən uca Heydər,
Özünün ən şirin payın Heydərə.
X X X
Azərbaycan Prezidenti İlham Əliyev görüşdə nitq söylədi.
(Dövlətimizin başçısının nitqi qəzetin bugünkü nömrəsinin birinci səhifəsində dərc olunur).
X X X
Sonra Azərbaycan Prezidenti İlham Əliyev sakinlərə yaxınlaşaraq onlarla səmimi söhbət etdi, qayğıları ilə maraqlandı.
Ağsaqqallar, müharibə veteranları dövlətimizin başçısına dərin minnətdarlıq edərək dedilər ki, kaş bizim rayonumuzun rəhbərliyini iki il əvvəl göndərəydiniz. Üç aydır işə başlayıb, amma nə qədər işlər görübdür. O gələndən Yardımlı inkişafa başlayıbdır.
İLHAM ƏLİYEV: Mən onu təyin edəndə tapşırıq verdim ki, get insanlara qayğı göstər, bütün işləri gör və Yardımlını qabaqcıl rayona çevir. Yardımlı ucqar rayondur. Buraya gəlmirdilər, amma bundan sonra gələcəklər. Mən də gəlib yoxlayacağam. Yaxşı işlər görür, işə yaxşı başlayıb, gərək yaxşı da davam etdirsin.
SAKİNLƏR: Yardımlıya sizin bu gəlişiniz çox lazım idi. Kənd təsərrüfatı texnikası sarıdan çox əziyyət çəkirik.
İLHAM ƏLİYEV: İndi hər şey veriləcəkdir. Mən “Aqrolizinq” Səhmdar Cəmiyyəti yaratdım. Onun xətti ilə texnika alınır, gətiriləcək və bütün bölgələrə paylanılacaqdır.
SAKİNLƏR: Traktorlar, kombaynlar sovet dövründən qalmadır, köhnəlibdir. İnsanlar bellə, xışla şumlayırlar.
İLHAM ƏLİYEV: Mən deyirəm ki, burada işlər yaxşı gedəcəkdir. Bu, həm sizin üçün, həm də bütövlükdə ölkə üçün lazımdır. Ən çətin vəziyyətdə olan rayon ən qabaqcıl olmalıdır. İş, həmrəylik olan yerdə, quruculuq işləri aparılanda bu, mümkündür. Ona görə bu, hamımızın borcudur.
SAKİNLƏR: Bakıda, Lənkəranda və digər yerlərdə bizdən soruşanda ki, haralısınız, deyirdik Lənkərandanıq. Yardımlı deyə bilmirdik. Yeni icra hakimiyyəti başçısı Süleyman müəllim tərifi xoşlamır, ancaq həqiqətən tərifəlayiqdir. Onun gəlişindən sonra rayonda ağ daşdan evlər, məktəblər tikilir.
İLHAM ƏLİYEV: Neçə məktəb tikilir?
SAKİNLƏR: 18 məktəb tikilir. Sizin kadr siyasətiniz çox güclüdür, uzaqgörənsiniz. Biz Sizinlə fəxr edirik. Bəlkə də, ilin sonunadək rayon mərkəzi şəhərə bənzəyəcəkdir.
İLHAM ƏLİYEV: Elə də olmalıdır. Kadr məsələsini düz deyirsiniz. Bu, eyni zamanda niyyətdən asılıdır. İcra hakimiyyətinin başçısı xalqa xidmət etməyə gəlməlidir. O, başqa məramla gəlməməlidir. Gəlib adamları soymaqla, onların qanını sormaqla, rüşvət almaqla məşğul olmamalıdır. Mənim prinsipim budur. Mən göndərdiyim icra hakimiyyəti başçılarına bildirirəm ki, yaxşı işləsən, fəaliyyətini qiymətləndirəcək, sənə daha böyük vəzifə verəcəyəm. Amma təmiz işlə, insanlara qayğı göstər, çünki biz insanlar üçün işləyirik. Prezident də xalqın xidmətçisidir. Sadəcə olaraq, bu, ən yüksək icra vəzifəsidir. Ona görə əsas budur ki, hansı niyyətlə gəlir.
Yardımlı sakinləri problemlərindən də söhbət açdılar. Dövlətimizin başçısı məktub və şikayətlərə diqqətlə baxılacağını bildirdi və dedi ki, mən buraya gəldim, yol yaxşı vəziyyətdə deyil, çoxdandır təmirsizdir. Mən tapşırıq vermişəm ki, baxsınlar. Nəqliyyat naziri də buradadır, tapşırıram, məşğul olun və qısa müddət ərzində Masallıdan Yardımlıya yaxşı, rahat yol çəkilsin.
ZİYA MƏMMƏDOV (nəqliyyat naziri): Cənab Prezident, Sizin tapşırığınızla 15 milyard manat ayrılıbdır. Gələn ilin birinci yarısında 50 kilometrlik bu yol beynəlxalq standartlara uyğun qurulub Sizə məruzə olunacaqdır.
İLHAM ƏLİYEV: Yol tikilib qurtarandan sonra açılışına gələcəyəm.
SAKİNLƏR: Allah qoysa. Biz həmişə Sizin və kadrlarınızın arxasınca gedəcək, dəstəkləyəcəyik. Bizə qalsa, 20-30 il Sizi Prezident seçəcəyik. Allah Sizdən razı olsun.
Bölmənin digər xəbərləri
