RƏCƏB TAYYİB ƏRDOĞAN: BAŞ ÖRTÜYÜ DİNİN RƏMZİ DEYİLDİR
AZƏRTAC-ın xüsusi müxbiri xəbər verir ki, Türkiyənin Baş naziri Rəcəb Tayyib Ərdoğan Almaniyanın “Di Welt am Sonntaq” qəzetinə müsahibəsində bildirmişdir ki, baş örtüyü dini atribut və konfessiyanın rəmzi deyildir. Avropa ölkələrində məskunlaşmış və ictimai həyata qatılmış müsəlman türk qadınlarının məişətdə, iş yerlərində və təhsil müəssisələrində könüllü olaraq baş örtüyü daşıması adət-ənənələrimizin qorunub saxlanması və milli-mənəvi dəyərlərimizin nəsildən-nəslə ötürülməsinin bariz rəmzidir. Xristianlığın dini atributu olan xaçdan və xaç suyuna çəkilməkdən tamamilə fərqli olaraq, türk qadınının baş örtüyü islamın təbliğinə xidmət edən mənəviyyat deyil, ictimai həyatın bütün sahələrində, ailə çərçivəsində və məişətdə qadın ləyaqətini, abırını saxlayan fəal insan mənəviyyatıdır.
O, xüsusi vurğulamışdır ki, türk qadınlarının Avropa ölkələrində ictimaiyyət arasında baş ortüyündə görünməsi dinlərarası dialoqun inkişafına öz müsbət təsirini göstərər, tolerantlıqdan və konfessiyaların azad fəaliyyəti üçün yaradılmış imkanlardan bəhrələnməyin parlaq ifadəsi sayıla bilər.
Bölmənin digər xəbərləri
