RƏCƏB TAYYİB ƏRDOĞAN: YAXIN ON İLDƏ QARDAŞ AZƏRBAYCAN DÜNYANIN ZƏNGİN ÖLKƏSİNƏ ÇEVRİLƏCƏKDİR
Xəbər verdiyimiz kimi, Azərbaycan Respublikasının kənd təsərrüfatı naziri İsmət Abasov Ankarada BMT-nin Ərzaq və Kənd Təsərrüfatı Təşkilatının (FAO) Türkiyə, Azərbaycan və Mərkəzi Asiya ölkələri üzrə subregional ofisinin açılış mərasimində iştirak etmək üçün Türkiyənin kənd təsərrüfatı və kənd işləri naziri Mehdi Əkərin dəvəti ilə bu ölkədə səfərdədir.
Nazirliyin mətbuat xidmətindən AZƏRTAC-a bildirmişlər ki, açılış mərasimində İsmət Abasovun Türkiyənin Baş naziri Rəcəb Tayyib Ərdoğanla qısamüddətli görüşü olmuşdur.
Görüşdə Azərbaycan ilə Türkiyənin iqtisadi əməkdaşlığının müxtəlif aspektləri, o cümlədən aqrar sahədə əlaqələrin daha da genişləndirilməsinin zəruriliyi müzakirə olunmuşdur. Rəcəb Tayyib Ərdoğan demişdir ki, Prezident İlham Əliyevin rəhbərliyi altında Azərbaycanın sürətli inkişafı yaxın vaxtlarda onu dünyanın ən qabaqcıl ölkələri sırasına çıxaracaqdır. Yaxın on ildə qardaş Azərbaycan dünyanın zəngin ölkəsinə çevriləcəkdir.
İsmət Abasov ölkəsinin ünvanına xoş sözlər üçün təşəkkür etmiş və Azərbaycanda qardaş Türkiyə ilə bütün sahələrdə, o cümlədən kənd təsərrüfatı sahəsində əməkdaşlığa üstünlük verildiyini bildirmişdir. O demişdir ki, Ankarada FAO-nun subregional ofisinin fəaliyyətə başlaması qardaş ölkələrimiz arasında ənənəvi əməkdaşlıq əlaqələrinin genişlənməsinə və daha da dərinləşməsinə zəmin yaradacaqdır.
Bölmənin digər xəbərləri
