Rəşad Mahmudov: Ölkə səhiyyəsinə ayrılan büdcə əvvəlki illərlə müqayisədə 400 faiz artıb
Bakı, 27 noyabr, AZƏRTAC
“Azərbaycan səhiyyənin inkişafı yönündə öz tarixinin ən uğurlu dönəmlərini yaşayır. Ölkə səhiyyəsinə ayrılan büdcənin əvvəlki illərlə müqayisədə 400 faiz artmasının şahidiyik. Yeni tibb mərkəzlərinin tikintisi, maddi-texniki imkanların artırılması, insan resurslarına verilən dəyər, icbari tibbi sığortanın tətbiqi ilə birlikdə Azərbaycanda aparılan səhiyyə islahatları bizi sevindirməklə birlikdə, səhiyyə işçiləri olaraq üzərimizə böyük bir məsuliyyət də qoyur”.
AZƏRTAC xəbər verir ki, bunu Dövlət Gömrük Komitəsi Tibbi Xidmət İdarəsinin Elmi-Təcrübi və Tədris Mərkəzinin rəisi, Milli Məclisin Səhiyyə komitəsinin sədr müavini Rəşad Mahmudov Ümummilli Lider Heydər Əliyevin 100 illik yubileyinə həsr edilmiş "Ana və uşaq sağlamlığı: mövcud problemlərə müasir baxış" mövzusunda beynəlxalq elmi konqresdə çıxışı zamanı deyib.
"Sağlam düşüncəyə malik olan hər bir səhiyyə işçisi həmin məsuliyyəti dərk edərək Prezident İlham Əliyev və onun humanizm bayrağı altında sıx birləşərək bütün çətinliklərin öhdəsindən layiqincə gələcək. Çünki hər zaman islahatlar özü ilə gözəlliklərlə yanaşı, çətinliklər də gətirir. Həmin problemləri aşkar edib, onları ən sürətli şəkildə həll edə bilmək dövlətlə birlikdə səhiyyə işçilərinin də üzərinə düşən məsuliyyətlərdən biridir", - deyə R.Mahmudov bildirib.
Bölmənin digər xəbərləri
