RESPUBLİKA GÜNÜ ÖZBƏKİSTANDA DA QEYD OLUNMUŞDUR

30.05.2006 [15:23]
Çap et
A⁺ A^-

AZƏRTAC-ın xüsusi müxbiri xəbər verir ki, Azərbaycanın Özbəkistandakı səfirliyi 28 May - Respublika günü ilə əlaqədar Daşkənddəki “Radisson-Sas” mehmanxanasında tədbir keçirmişdir. Mərasimdə Özbəkistanın Baş nazirinin müavini Nadircon Xanov, xarici ölkələrin səfirləri, diasporumuzun üzvləri və yerli ictimaiyyətin nümayəndələri iştirak etmişlər.

Səfir Namiq Abbasov çıxış edərək, 88 il əvvəl Şərqdə ilk demokratik respublikanın məhz Azərbaycanda qurulduğunu qeyd etmiş, bu dövlətin qısa müddət ərzində gördüyü işlərdən danışmışdır. O, Ermənistan-Azərbaycan, Dağlıq Qarabağ münaqişəsi, bunun yaranma səbəbləri və acı nəticələri barədə geniş məlumat vermiş, erməni təcavüzkarları tərəfindən işğal olunmuş Azərbaycan ərazilərinin vəhşicəsinə talandığını iştirakçıların diqqətinə çatdırmışdır. Səfir Azərbaycan iqtisadiyyatının inkişafı və əldə olunmuş uğurlar barədə də geniş məlumat vermişdir.

Respublika günü səfirliyin binasında da qeyd olunmuşdur. Özbəkistanda təhsil alan 150-yə yaxın azərbaycanlı tələbə ümummilli lider Heydər Əliyevin səfirliyin foyesindəki abidəsi önünə tər çiçək dəstələri qoymuşlar.

Səfir Namiq Abbasov tələbələri salamlamış, ölkəmizin regionda qüdrətli dövlətə çevrildiyindən danışmış, Azərbaycanın gənclər siyasəti haqqında məlumat vermişdir.

Tələbələr adından Azərbaycan Prezidenti İlham Əliyevə və Özbəkistan Prezidenti İslam Kərimova müraciət qəbul edilmişdir.

Sonda təhsildə fərqlənən bir qrup tələbəyə Azərbaycan səfirliyi adından fəxri fərmanlar və musiqi diskləri təqdim olunmuşdur.