RESPUBLİKA GÜNÜ QARSDA TƏNTƏNƏ İLƏ QEYD OLUNMUŞDUR

29.05.2006 [15:06]
Çap et
A⁺ A^-

Azərbaycan Respublikasının Qars şəhərindəki Baş konsulluğundan AZƏRTAC-a bildirmişlər ki, mayın 27-də Türkiyə Respublikasının 9-cu Prezidenti Süleyman Dəmirəl Qarsa gələrək ümummilli liderimiz Heydər Əliyevin buradakı büstü önünə gül-çiçək dəstələri düzmüş, ulu öndərin əziz xatirəsini ehtiramla yad etmişdir. Sonra Süleyman Dəmirəl Azərbaycanın Qarsdakı Baş konsulluğunun işçiləri ilə görüşmüşdür. Baş konsul Həsən Zeynalov Azərbaycan Prezidenti İlham Əliyevin salamlarını Süleyman Dəmirələ çatdırmış, konsulluğun fəaliyyəti barədə ona məlumat vermişdir.

Süleyman Dəmirəl Qarsda Baş konsulluğun açılmasının çox vacib olduğunu qeyd etmiş, Azərbaycan xalqını 28 May – Respublika günü münasibətilə təbrik etmiş Prezident İlham Əliyevə ən xoş arzularını çatdırmağı xahiş etmişdir.

Mayın 28-də Qarsda konsulluq tərəfindən Respublika günü münasibətilə geniş tədbir keçirilmişdir. Mərasimdə Qars və konsulluğun xidmət dairəsində olan vilayətlərin rəsmiləri ilə yanaşı, Gürcüstandan və Krımdan gəlmiş nümayəndələr, Ankaradan millət vəkilləri, İstanbuldan Kazım Qarabəkir Vəqfinin sədri, Azərbaycanda həmişə minnətdarlıqla anılan Kazım Qarabəkir paşanın qızı Timsal Qarabəkir iştirak etmişlər.

Baş konsul Həsən Zeynalov, Qars valisi Mehmet Üfuk Eren, Gürcüstan nümayəndə heyətinin başçısı Revaz Sandroşvili, Krım nümayəndələri adından Krım Taviya Milli Universiteti Krım-Tatar və Şərqşünaslıq fakültəsinin dekanı professor Ayder Memetov tədbirdə çıxış etmişlər.

Tədbir Azərbaycandan gəlmiş incəsənət ustalarının konsert proqramı ilə davam etmişdir.

Bayram mərasimi atəşfəşanlıqla başa çatmışdır.