Rişi Sunak: Böyük Britaniya bu yay ukraynalı pilotların hazırlanmasına başlamaq niyyətindədir
Bakı, 21 may, AZƏRTAC
Böyük Britaniya bu yay ukraynalı pilotların hazırlanmasına başlamaq niyyətindədir.
AZƏRTAC xəbər verir ki, bu barədə Böyük Britaniyanın Baş naziri Rişi Sunak bazar günü Xirosimada keçirilən Yeddilik Qrupunun (G7) sammitindən sonra bildirib.
"Biz Ukraynanı gələcək üçün lazım olan silahlı qüvvələrin qurulmasında dəstəkləyirik və Böyük Britaniya bu yay ukraynalı pilotların təliminə başlayacaq", - deyə Sunak qeyd edib. Britaniya hökumətinin başçısının sözlərinə görə, ABŞ Prezidenti Co Baydenin Xirosimada F-16 qırıcıları ilə bağlı bəyanatı sammitdə əsl irəliləyiş olub.
Bayden G7 liderləri ilə Xirosimada keçirdiyi görüşdə Vaşinqtonun F-16 da daxil olmaqla müasir döyüş təyyarələrini idarə etmək üçün ukraynalı pilotlara təlim keçmək üçün beynəlxalq səyləri dəstəkləyəcəyini bildirib. Şənbə günü Rusiya xarici işlər nazirinin müavini Aleksandr Qruşko F-16-ları Kiyevə çatdırmaq niyyətini şərh edərkən bildirib ki, Qərb ölkələri Ukrayna münaqişəsində eskalasiya yolu ilə getməkdə davam edirlər, lakin Rusiya bunu öz planlarında nəzərə alacaq.
Bölmənin digər xəbərləri
