ROBERT SİMMONS: AZƏRBAYCANIN NATO İLƏ ƏMƏKDAŞLIĞININ BUGÜNKÜ SƏVİYYƏSİNDƏN RAZIYAM
AZƏRTAC xəbər verir ki, fevralın 8-də ölkəmizdə səfərdə olan NATO Baş katibinin Cənubi Qafqaz və Mərkəzi Asiya üzrə xüsusi nümayəndəsi Robert Simmons mətbuat konfransı keçirmişdir.
Tədbiri xarici işlər nazirinin müavini Araz Əzimov açaraq Robert Simmonsun səfərindən əsas məqsədin Azərbaycan rəhbərliyi ilə görüşərək ölkəmizin NATO ilə əməkdaşlığının daha da inkişafı ilə bağlı məsələləri müzakirə etmək olduğunu bildirmişdir.
Robert Simmons səfərinin yekunları haqqında məlumat verərək, alyansın Baş katibinin tapşırığı əsasında xüsusi nümayəndə kimi regiona ilk dəfə səfər etdiyini söyləmişdir.
Xüsusi nümayəndə Bakıda keçirdiyi görüşlərdə Azərbaycanın NATO-ya təqdim etdiyi “Fərdi tərəfdaşlıq fəaliyyəti” Planını müzakirə etdiklərini diqqətə çatdırmışdır.
Azərbaycanın NATO ilə bir çox sahələrdə geniş əməkdaşlıq etdiyini bildirən Robert Simmons, əlaqələrin bugünkü səviyyəsindən razı qaldığını diqqətə çatdırmışdır. O, “Fərdi tərəfdaşlıq fəaliyyəti” Planının bu yaxınlarda NATO Şurasında təsdiqlənəcəyini bildirmişdir.
Robert Simmons Kosovo, Əfqanıstan və İraqda sülhün qorunması işində yaxından iştirakına görə Azərbaycana təşəkkür etdi.
Baş katibin xüsusi nümayəndəsi Ermənistan-Azərbaycan, Dağlıq Qarabağ münaqişəsi barədə kifayət qədər məlumat topladığını və onları Brüsseldə alyansın Baş katibi Yaap de Hoop Sxefferə təqdim edəcəyini demişdir.
Sonda Robert Simmons jurnalistləri maraqlandıran sualları cavablandırmışdır.
Bölmənin digər xəbərləri
