ROMA PAPASINI NİYƏ ÖLDÜRMƏK İSTƏYİRDİLƏR?
Lakin Ağcanın azadlığa çıxmazdan bir gün əvvəl Türkiyənin “Vətən” qəzetinə verdiyi müsahibəsindəki bir sıra açıqlamalar Qərbdə böyük maraq doğurmuşdur. Bu, ilk növbədə, Ağcanı Roma Papasına güllə atmağa sövq edən bəzi məqamlarla bağlıdır. Vaxtilə o, söz vermişdi ki, xatirələrini yazıb, Pontifikə sui-qəsd haqqında bütün həqiqəti açıb söyləyəcəkdir.
O, nə üçün Roma Papasını öldürməyə çalışdığı barədə sualın cavabında bildirmişdir ki, bunu “Fatimanın üçüncü sirri”ndə axtarmaq lazımdır. Ağcanın əqidəsincə, bu sirr tutduğu əmələ görə məsuliyyəti onun üzərindən götürür.
“Fatimanın üçüncü sirri”nin yaranması 1917-ci il mayın 13-də, Madonna Portuqaliyanın Fatima kəndindən olan üç uşağın qarşısında zühur edən gün baş vermişdir. 2000-ci ildə Roma Papası bu sirri yaymışdır. “Fatimanın üçüncü sirri” Pontifikə sui-qəsdi belə təsvir edir: “Tamamilə ağ libasa bürünən yepiskop yerə ölü kimi düşəcək, amma sağ qalacaq, çünki dünyanı kommunizmdən xilas etməlidir. Bu onun vəzifəsidir”.
Ağca “Vətən” qəzetinə müsahibəsində həmçinin demişdir: “Mən öz “Bibliya”mı yazmaq niyyətindəyəm. Qoy sonra onu ilahiyyatçılar və alimlər ənənəvi Müqəddəs kitabla müqayisə etsinlər və hansı kitabın daha doğru-düzgün və məntiqi olduğunu söyləsinlər. Bu, 80-90 səhifəlik bir kitab olacaq və zənnimcə, birinci mərhələdə bütün dünyada 100 milyon nüsxə tirajla yayılacaqdır”. Onun sözlərinə görə, sponsor sarıdan problemlə üzləşməyəcəkdir. Bir də ona görə ki, onun “Bibliya”sının maya dəyəri 8 min dollardan artıq olmayacaqdır.
Bu, Ağcanın öz adını əbədiləşdirmək üçün ilk cəhdi deyildir. Hələ İstanbul həbsxanasında yatarkən digər ağlasığmaz bəyanatlar da vermişdi. Məsələn, dediyinə görə, Vatikan ona katolikliyə keçmək üçün guya 50 milyon dollar təklif etmişdi. 2001-ci ildə isə “Əl-Qaidə”nin başçısı Üsəma ben Ladeni “diri, yaxud ölü” tutmağa hazır olduğunu bildirmişdi.
2005-ci ildə o, Den Braunun “Da Vinçinin kodu” adlı məşhur bestsellerinin davamını yazmaq niyyətində olduğunu elan etmişdir. Ağca kitaba hətta yeni ad - “Vatikanın kodu” adı vermiş və Brauna əməkdaşlıq haqqında təklif göndərmişdir.
Ağca II İohann Pavelin həyatı haqqında film çəkməyə başlayan görkəmli Amerika aktyoru və rejissoru Mel Gibsona məktub yazaraq, ssenarinin hazırlanmasında bir “ekspert” kimi öz köməyini təklif etmişdir.
“Boz qurd”un cəfəngiyat kimi görünən bütün bu təşəbbüsləri yerli KİV-ləri dəfələrlə belə fikir söyləməyə sövq etmişdir ki, Ağca ruhi xəstəliyə mübtəla olmuşdur. Lakin o, bütün bunlara cavab verərək demişdir ki, ruhi xəstə olan adam bu qədər şeyi yadında saxlaya və onun bu qədər biliyi ola bilməz.
Hələlik isə Ağca Türkiyə ordusunda xidmət etmək üçün tibbi müayinədən keçməlidir.
Bölmənin digər xəbərləri
