Romada “Azərbaycan: mədəniyyət, cəmiyyət və iqtisadiyyat” mövzusunda konfrans keçirilib VİDEO
Roma, 2 iyul, AZƏRTAC
Azərbaycan-İtaliya Assosiasiyasının, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının və İtaliyanın Coğrafiya Cəmiyyətinin (ICC) birgə təşkilatçılığı ilə Romada “Azərbaycan: mədəniyyət, cəmiyyət və iqtisadiyyat” mövzusunda konfrans keçirilib.
Tədbirin moderatoru, Roma Tor Verqata Universitetinin aparıcı tədqiqatçısı Simone Bozzato Azərbaycan ilə İtaliya arasındakı dostluq əlaqələrindən danışıb. Bildirib ki, münasibətlərimizin dərinləşməsində hər iki ölkənin parlamentlərində fəalliyyət göstərən dostluq qruplarının xidməti böyükdür. Tədbir ölkələrimiz arasında müxtəlif sahələrdə inkişaf etməkdə olan münasibətlərin müzakirəsi baxımından böyük əhəmiyyət kəsb edir.
Konfransın təşkilatçılarına minnətdarlığını bildirən Milli Məclisin deputatı, Azərbaycan-İtaliya parlamentlərarası dostluq qrupunun rəhbəri Azər Kərimli ICC-nin nümayəndələrinin Azərbaycana səfərini xatırladıb. Bildirib ki, səfər çərçivəsində ölkəmizdə mövcud olan multikulturalizm və dini birgəyaşayış kimi önəmli məsələlərə xüsusi diqqət ayrılıb.
Azərbaycanda multikulturalizm dəyərlərinin dərin köklərə malik olduğunu deyən A.Kərimli diqqətə çatdırıb ki, uzun əsrlər boyu müxtəlif millətlərin və dinlərin nümayəndələri ölkəmizdə sülh və dostluq şəraitində yaşayıblar. Dünyada dini və etnik toqquşmaların tüğyan etdiyi bir zamanda Azərbaycan məhz bu baxımdan model ölkə ola bilər.
Bakıda yüksək səviyyədə keçirilən ilk Avropa Oyunları barədə məlumat verən deputat qeyd edib ki, müxtəlif ölkələri təmsil edən 6 min atleti bir araya gətirən bu Oyunlar Azərbaycan üçün qürur mənbəyi oldu. Azərbaycan bu tədbirin ən yüksək səviyyədə təşkili üçün bütün imkanlarından istifadə etdi. Təəssüf ki, Oyunlar ərəfəsində Azərbaycan Avropanın, o cümlədən İtaliyanın bir sıra media qurumları tərəfindən qarayaxma kampaniyasına məruz qaldı. “Bu amil bizi çox təəccübləndirir. Çünki Avropanın, eləcə də İtaliyanın Azərbaycan ilə çox yaxşı diplomatik, siyasi, iqtisadi və mədəni əlaqələri mövcuddur. Əminik ki, bir neçə media strukturunun bu münasibəti bizim dərin dostluq əlaqələrimiz olan İtaliyanın ümumi mövqeyini əks etdirmir”, - deyə o əlavə edib.
Azərbaycanın sürətli iqtisadi inkişafından danışan İtaliya-Azərbaycan parlamentlərarası dostluq qrupunun sədri Sercio Divina ölkəmizin tərəqqisinin göz qabağında olduğunu bildirib. Vurğulayıb ki, Azərbaycan son illər bir sıra mötəbər tədbirlərə ev sahibliyi edir. Bu sırada “Eurovision-2012” mahnı müsabiqəsi və ilk Avropa Oyunlarını xüsusi vurğulamaq olar. Əminik ki, Azərbaycan bundan sonra da mühüm uğurlara imza atacaq.
S.Divina diqqətə çatdırıb ki, Azərbaycanda qədimliklə müasirliyin vəhdət təşkil etməsi paytaxt Bakıya gələnlərin marağına səbəb olur. Bu şəhərin müasirləşməsi qədim tarixi abidələrin qorunması kontekstində həyata keçirilir. Bu yaxınlarda Bakıda ilk Avropa Oyunlarının yüksək səviyyədə təşkil edilməsi Azərbaycanın necə güclü bir ölkə olduğunu bütün dünyaya bir daha sübut etdi. Ölkələrimiz arasında əlaqələrin bundan sonra da genişlənməsi istiqamətində əlimizdən gələni əsirgəməyəcəyik.
Roma şəhər meriyasının nümayəndəsi xanım Simonetta Dominici çıxış edərək Azərbaycanda son illərdə müşahidə olunan sürətli inkişaf prosesindən danışıb. Diqqətə çatdırıb ki, bu ölkə artıq mötəbər tədbirlərin keçirildiyi bir məkana çevrilib. Şübhəsiz, Azərbaycanın gələcəkdə müvafiq istiqamətdə önəmi daha da artacaq. Zəngin mədəni irsə malik olan Azərbaycanın digər ölkələrin mədəni dəyərlərinə də hörmətlə yanaşması təqdirəlayiqdir. Azərbaycan hökumətinin dəstəyi ilə İtaliyada bir sıra tarixi abidələrin bərpasına yardım göstərilməsi və birgə həyata keçirilən digər mədəni layihələr bu baxımdan xüsusi önəm kəsb edir.
Sonra tədbir “Müasir ssenaridə Azərbaycanın mövqeyi” mövzusunda sessiya ilə davam etdirilib. Bölmə iclasında qlobal arenada ölkəmizin rolunun möhkəmlənməsi, Azərbaycanın dünya dövlətləri arasında söz sahibi olan ölkəyə çevrilməsi və beynəlxalq məsələlərin həllində fəal iştirakı diqqət mərkəzində olub. Eyni zamanda, çıxış edənlər Ermənistan-Azərbaycan, Dağlıq Qarabağ münaqişəsinə toxunaraq problemin tarixi, səbəbləri və nəticəsi ilə bağlı məlumat veriblər. Diqqətə çatdırılıb ki, Ermənistan silahlı qüvvələrinin Azərbaycana hərbi təcavüzü nəticəsində bu ölkənin torpaqlarının 20 faizi işğal olunub, bir milyondan artıq azərbaycanlı qaçqın və məcburi köçkünə çevrilib.
Növbəti sessiyada ICC-nin nümayəndələri Azərbaycana səfərləri ilə bağlı təəssüratlarını bölüşüblər. Bildiriblər ki, bu ölkədəki multikultural mühit təqdirəlayiqdir. Bu önəmli bəşəri dəyəri Azərbaycan təcrübəsində öyrənmək və digər ölkələrdə tətbiq etmək yaxşı nəticələr verə bilər.
Sonda İtaliya-Azərbaycan Assosiasiyasının sədri xanım Paola Kasaqrande ölkələrimiz arasında əlaqələrin inkişafına töhfə verəcək qalib layihələrin müəllifləri olan italiyalı tələbələri elan edib. Onlar Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən mükafatlandırılıblar.
Maqsud Dadaşov
AZƏRTAC-ın xüsusi müxbiri
Roma
Bölmənin digər xəbərləri
