Romada “Azərbaycan və Alban Apostol kilsəsi” mövzusunda konfrans keçirilmişdir
Roma, 5 iyun (AZƏRTAC). Romada, İtaliya Senatının kitabxanasında İtaliya-Azərbaycan parlamentlərarası dostluq qrupunun, “Kritikalia”, “Vox Populi”, “İl Nodo di Gordio” elmi-tədqiqat mərkəzlərinin təşkilatçılığı və Azərbaycanın bu ölkədəki səfirliyinin dəstəyi ilə “Azərbaycan və Alban Apostol kilsəsi” mövzusunda konfrans keçirilmişdir.
İtaliyanın məşhur jurnalisti Corco Stamatopulosun moderatorluğu ilə keçirilmiş tədbirdə Azərbaycanın İtaliyadakı səfiri Vaqif Sadıqov, İtaliya-Azərbaycan parlamentlərarası dostluq qrupunun sədri, senator Serco Divina, bu ölkənin mədəniyyətlərarası münasibətlər və dinlərarası əməkdaşlıq üzrə tədqiqatçıları, KİV-lərin nümayəndələri iştirak etmişlər.
Konfransda çıxış edən S.Divina bildirmişdir ki, Azərbaycanda bütün tarixi dövrlərdə müxtəlif dinlərin və mədəniyyətlərin nümayəndələri üçün açıq mühit mövcud olmuşdur. O, Azərbaycan ilə İtaliya arasındakı yüksək səviyyəli əlaqələri xüsusi vurğulayaraq diqqətə çatdırmışdır ki, ölkələrimizin birgə təşəbbüsü ilə həyata keçirilən tədbirlər uzun illərdir davam edən əməkdaşlığımıza töhfə verməkdədir.
Azərbaycanda mövcud olan yüksək tolerantlıq mühitindən və mədəniyyətlərarası əlaqələrdən bəhs edən səfir V.Sadıqov ölkəmizdə hər zaman bütün millətlərin, dinlərin nümayəndələrinə bərabər hüquqların verildiyini, onların sülh və dostluq şəraitində yaşadıqlarını bildirmişdir. O, vurğulamışdır ki, Azərbaycan dinlərarası münasibətlərin tənzimləndiyi önəmli bir məkana çevrilmişdir.
V.Sadıqov qeyd etmişdir ki, Azərbaycanın birinci xanımı, Heydər Əliyev Fondunun prezidenti Mehriban Əliyevanın iyunun 2-də Roma Papası Fransisk ilə görüşü, Müqəddəs Marçellinio və Pietro katakombalarının Fondun dəstəyi ilə bərpası dinlərarası dialoqa Azərbaycanın verdiyi töhfənin ən son nümunələridir.
“İl Nodo di Gordio” tədqiqat mərkəzinin rəhbəri Daniele Ladzeri dünyada sivil birgəyaşayış və əməkdaşlıq prinsiplərinin geniş yayıldığı bir zamanda sürətlə inkişaf edən Azərbaycanda mövcud olan etnik-dini tolerantlığın, sivilizasiyalararası əlaqələrin müzakirəsi baxımından konfransın yaxşı imkan yaradacağını vurğulamışdır.
İtaliyanın müxtəlif ölkələrdəki sabiq səfirləri Culio Priçioni və Quido Lenzi bildirmişlər ki, Azərbaycan Cənubi Qafqaz regionunun ən qüdrətli dövlətidir. Bu ölkə həm strateji əhəmiyyətinə və təbii ehtiyatlarına, həm də bəşəri mədəni dəyərlərə verdiyi töhfələrə görə dünyada nüfuz sahibidir. Avropanın bir hissəsi olan Azərbaycan tarixi, mədəni, iqtisadi, dini baxımdan buradakı ölkələrlə bir çox ortaq dəyərləri bölüşür.
İtaliya tədqiqatçıları Dieqo Flores, Aleksander Bertirotti, Mikele Bernardini, Ancelo Yakovella, İSESCO-nun Qərb Müsəlmanları üzrə Şurasının sədri imam Yahya Pallaviçini, İtaliya Yəhudi İcmaları İttifaqının nümayəndəsi Viktor Maciyar, İtaliyanın məşhur teatr və kino ustası Moni Ovadia, Rus Pravoslav Kilsəsinin nümayəndəsi, “Qafqaz Albaniyasında xristianlığın tarixi” adlı kitabın müəllifi Aleksiy Nikonorov Azərbaycanın müxtəlif mədəniyyətlərin nümayəndələrinin bir arada sülh şəraitində yaşadıqlarından, bu ölkədə mövcud olan yüksək tolerantlıq mühitindən danışmışlar. Bildirmişlər ki, Azərbaycan bu istiqamətdə digər ölkələrə nümunə ola bilər.
Sonra “Azərbaycanın rəmzlərindən biri olan Alban Apostol kilsəsinin tarixi kökləri” kitabının təqdimatı olmuşdur.
Nəşrin həmmüəllifləri, professorlar Paolo Zammatteo, Ermanno Vizintainer, Angelo Mekka və Andrea Marçiliano kitabın ölkəmizin ərazisində yaşamış etnosların dini etiqadları, mədəni dəyərləri ilə yaxından tanış olmaq üçün yaxşı imkan yaratdığını bildirmişlər. Diqqətə çatdırmışlar ki, nəşrdə Qafqaz Albaniyasının xristian aləmi ilə əlaqələri, VII və VIII əsrdə ərəblər tərəfindən bu ərazilərin ələ keçirilməsi, İslam dininin yayılması kimi mühüm tarixi mərhələlər yer almışdır. Kitabda, həmçinin Azərbaycan ərazisində yaşayan etnik qruplar haqqında da məlumat verilir.
Maqsud Dadaşov
AZƏRTAC-ın xüsusi müxbiri
Roma
Bölmənin digər xəbərləri
