RUMINİYA PREZİDENTİ MİNGƏÇEVİRDƏ
Rumıniya Prezidenti İon İliyesku ölkəmizə rəsmi səfərinin son günü Mingəçevirdə olmuşdur.
Dost ölkənin rəhbəri 1953-cü ildə Moskvada ali təhsil alarkən təcrübə keçdiyi Mingəçevir su elektrik stansiyasına gəldi. Bayramsayağı bəzədilmiş stansiyada ali qonağı energetiklər, şəhər ictimaiyyətinin nümayəndələri hərarətlə qarşıladılar.
Cənab İon İliyesku həyatının gənclik, tələbəlik illərinin silinməz xatirəsinə çevrilmiş Mingəçevir SES tikintisində keçirdiyi unudulmaz günlərdən danışdı, o vaxtlar hələ təzə inşasına başlanan stansiyanın indi belə möhtəşəm bir energetika obyektinə çevrilməsindən sevinc və qürur duyduğunu bildirdi.
Ali qonağa Mingəçevir SES-in panoramasının təsvir olunduğu tablo hədiyyə edildi. Prezident İon İliyesku stansiyanın xatirə kitabına ürək sözlərini yazdı, kollektivin üzvləri ilə xatirə şəkli çəkdirdi.
Daha sonra Rumıniya Prezidenti və onu müşayiət edən şəxslər stansiyanı gəzdilər, müəssisənin iş rejimi ilə tanış oldular.
Mingəçevirlilər əziz qonağı əsl Azərbaycan qonaqpərvərliyi ilə yola saldılar.
X X X
Rumıniya Prezidenti və onu müşayiət edən nümayəndə heyəti oktyabrın 30-da Gəncədən vətənə yola düşdülər.
Prezident İon İliyeskunu hava limanında Azərbaycan baş nazirinin müavini Yaqub Eyyubov, xarici işlər nazirinin müavini Xələf Xələfov və digər rəsmi şəxslər yola saldılar.
Foto Oqtay Aydınoğlunun, Yaşar Xəlilovun,
Namiq Məmmədovun və Rafiq Bağırovundur
Bölmənin digər xəbərləri
