RUSİYA BEYNƏLXALQ TERRORİZMLƏ MÜBARİZƏ TƏDBİRLƏRİ GÖRÜR

11.09.2004 [11:14]
Çap et
A⁺ A^-

AZƏRTAC-ın xüsusi müxbiri xəbər verir ki, RF Silahlı Qüvvələri Baş Qərargahının rəisi Yuri Baluyevski Moskvada bildirmişdir ki, Rusiya Baş Qərargahı terrorçuların xaricdəki bazalarının yeri barədə məlumata malikdir. Bir gün əvvəl Y.Baluyevski vurğulamışdı ki, Rusiya terrorçuların xaricdəki bazalarına qabaqlayıcı zərbələr endirəcəkdir. O, jurnalistlərlə söhbətində demişdir ki, biz “heç kimi hədələmirik, lakin bu cür fəaliyyət forması həmvətənlərimizi müdafiə etmək üçün bizim qanuni hüququmuzdur”. Rusiya Baş Qərargahının rəisi, həmçinin nəzərə çatdırmışdır ki, terrorçuların xaricdəki bazalarına qabaqlayıcı zərbələr endirmək qərarı Rusiya Federasiyası Prezidentinin sanksiyası ilə qəbul ediləcəkdir. Qeyd olunmuşdur ki, Rusiya ərazisində törədilə biləcək bir çox terror aktlarının qarşısı güc qurumlarının, o cümlədən Baş qərargahın birgə səyləri nəticəsində alınmışdır.

Baş Qərargah qanunvericilik orqanlarına insanların kütləvi surətdə girov götürülməsi halları zamanı terrorçuların fəaliyyətini lokallaşdırmaq üçün silahlı qüvvələrin tətbiqinin daha dəqiq hüquqi əsaslandırılmasını nəzərdə tutan təkliflər vermişdir.

Eyni zamanda, Yuxarı palatanın Şimali Qafqazda vəziyyətin təhlili üzrə Müvəqqəti komissiyasının sentyabrın 10-da keçirilmiş iclasında RF Federasiya Şurasının sentyabrın 20-də növbədənkənar geniş iclasının çağırılması barədə qərar qəbul edilmişdir. Komissiyanın iclasında hüquq mühafizə orqanlarının vətəndaşların təhlükəsizliyinin təmin edilməsi üçün həyata keçirməli olduqları təxirəsalınmaz tədbirlər müzakirə olunmuşdur. Federasiya Şurasının sədri Sergey Mironov bu barədə məlumat verərək bildirmişdir ki, Federasiya Şurası Beslanda terror aktının araşdırılması və terrorizmlə mübarizə, Rusiya vətəndaşlarının təhlükəsizliyinin təmin edilməsi sahəsində qanunvericiliyin təkmilləşdirilməsi üzrə komissiya yaradacaqdır. Rusiya Prezidenti Vladimir Putin bu ideyanı dəstəkləmişdir.

RUSİYA BEYNƏLXALQ TERRORİZMLƏ MÜBARİZƏ TƏDBİRLƏRİ GÖRÜR

MÜƏLLİFLƏ ƏLAQƏ

Bölmənin digər xəbərləri