Rusiya Federal Təhlükəsizlik Xidməti Belarus Prezidentinə qarşı sui-qəsd hazırlayan şəxsləri saxlayıb
Moskva, 18 aprel, AZƏRTAC
Rusiya Federal Təhlükəsizlik Xidməti (FTX) Belarusda hərbi çevriliş və ölkə Prezidenti Aleksandr Lukaşenkoya qarşı sui-qəsd hazırlayan iki nəfəri saxlayıb.
AZƏRTAC xəbər verir ki, bu barədə FTX-nin İctimaiyyətlə Əlaqələr Mərkəzi məlumat yayıb.
Məlumatda deyilir ki, FTX Belarus Dövlət Təhlükəsizliyi Komitəsi ilə birlikdə keçirdiyi xüsusi əməliyyat nəticəsində ABŞ və Belarus vətəndaşlığı olan Yuri Zyankoviç və Belarus vətəndaşı Aleksandr Fedutanı saxlayıb. Bu şəxslər Belarusda çevriliş və ölkə Prezidenti Aleksandr Lukaşenkoya qarşı sui-qəsd hazırlamaqda şübhəli bilinirlər.
Plana əsasən, Belarusda hərbi çevriliş mayın 9-da, Qələbə paradı zamanı baş tutmalı və hakimiyyət milli barışıq komitəsinin əlinə keçməli idi.
FTX adı çəkilən şəxsləri Moskva restoranlarından birində keçirdikləri görüşdən sonra saxlayaraq Belarus xüsusi xidmət orqanlarına təhvil verib.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
