Rusiya ictimaiyyəti Orxan Zeynalovun həbsi ətrafında yaranmış vəziyyətdən çox narahatdır
Bakı, 31 oktyabr (AZƏRTAC). Xəbər verdiyimiz kimi, oktyabrın 18-də Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Milli Məclisin deputatı Azay Quliyev Yeqor Serbakovun ölümündə təqsirləndirilərək şübhəli şəxs kimi həbs edilən Orxan Zeynalov ilə əlaqədar Rusiya Federasiyası İctimai Palatasının sədri Yevgeni Velixova məktub göndərmişdir.
Müraciətdə məişət zəminində baş vermiş bu hadisənin milli müstəviyə çıxarılmasından, Orxan Zeynalovun hüquqlarının kobud şəkildə pozulması və onun zorakılığa məruz qalmasından ciddi narahatlıq ifadə edilmişdi.
Qeyri-Hökumət Təşkilatlarına Dövlət Dəstəyi Şurasından AZƏRTAC-a bildirmişlər ki, bu günlərdə Rusiya Federasiyası İctimai Palatasının sədri Y.Velixov müraciəti cavablandırmışdır. O, cavab məktubunda bildirmişdir ki, Rusiya ictimaiyyəti Orxan Zeynalovun həbsi ətrafında yaranmış vəziyyətdən çox narahatdır. Bununla əlaqədar İctimai Palata Rusiyanın daxili işlər naziri V.Kolokolçevə və baş prokuror Y.Çaykaya müraciət etmişdir. Y.Velixov qeyd etmişdir ki, baş verən bu hadisə yalnız Azərbaycana yönəlik deyil, ümumilikdə, Rusiyada olan miqrasiya probleminin təzahürüdür. İctimai Palata hazırda istintaqla bağlı vəziyyəti nəzarət altında saxladığını və prosesin gedişi ilə bağlı Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasını gələcəkdə də məlumatlandıracağını bildirmişdir.
Bölmənin digər xəbərləri
