Rusiya XİN Ermənistanın Avropa İttifaqı ilə mümkün yaxınlaşması barədə
Moskva, 14 fevral, AZƏRTAC
Avrasiya İqtisadi İttifaqının (Aİİ) və Avropa İttifaqının (Aİ) sistemləri hüquqi və iqtisadi bazalar nöqteyi-nəzərindən bir-birinə ziddir.
AZƏRTAC xəbər verir ki, bu barədə Ermənistanın Avropa İttifaqı ilə mümkün yaxınlaşması ətrafında yaranmış vəziyyəti şərh edən Rusiya Xarici İşlər Nazirliyinin rəsmi nümayəndəsi Mariya Zaxarova bildirib.
Onun sözlərinə görə, Aİ-yə inteqrasiya Ermənistanın Aİİ çərçivəsində iqtisadi və ticari əlaqələrinə təsir edə bilər ki, bu da dərindən təhlil olunmalıdır.
Rusiyalı diplomat bildirib ki, belə addımların nəticələrini Rusiya və ya Aİ deyil, Ermənistan hakimiyyətinin özü izah etməlidir. Onun fikrincə, mühüm nüansları gizlətmək və problemi ört-basdır etmək reallığın inkarı deməkdir və potensial dezinformasiyadır.
M.Zaxarova vurğulayıb ki, demokratik ölkələrdə belə taleyüklü qərarların qəbulu ictimai müzakirələr, rəy sorğuları və referendumlarla müşayiət olunur.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
