RUSİYADAN AZƏRBAYCANA QAZ NƏQLİ BƏRPA EDİLMİŞDİR

11.08.2004 [16:59]
Çap et
A⁺ A^-

AZƏRTAC xəbər verir ki, İTAR-TASS agentliyinin yaydığı məlumata görə, avqustun 10-da Mozdok-Qazıməmməd magistral boru kəməri ilə Rusiyadan Azərbaycana mavi qaz nəqlinə yenidən başlanmışdır. Kəmərin iyulun 5-də partladılan Terek çayı üzərindəki hissəsi tamamilə bərpa edilmişdir.

Partlayış nəticəsində diametri 1220 millimetr olan qaz kəmərinin 460 metri sıradan çıxmışdı. Həmin gündən Rusiyadan Azərbaycana mavi yanacaq ixracı dayandırılmışdı. “Kaspiyqazprom”un baş direktoru Kərim Hüseynov bildirmişdir ki, boru kəmərində qəzanın nəticələrinin aradan qaldırılması üçün bütün mütəxəssislər, işçi qüvvəsi və xüsusi texnika səfərbər edilmişdi. Onlar Çeçenistan ərazisində təhlükəli şəraitdə işləməli olmuşlar. Buna baxmayaraq, bütün işlər nəzərdə tutulduğu vaxtda görülüb başa çatdırılmışdır.

“Azəriqaz” Səhmdar Cəmiyyətindən AZƏRTAC-a bildirmişlər ki, avqustun 11-də gecə saat 01-dən etibarən kəmərlə Rusiyadan qaz alınmağa başlanmışdır.