Rusiyanın Tula vilayətində ildırım vurması nəticəsində üç nəfər həlak olub
Moskva, 14 iyul, AZƏRTAC
Rusiyanın Tula vilayətində göl kənarında baş verən ildırım hadisəsi nəticəsində bir uşaq da daxil olmaqla üç nəfər həyatını itirib, daha dörd nəfər xəsarət alıb.
AZƏRTAC xəbər verir ki, bu barədə Aleksin rayonunun administrasiya rəhbəri Pavel Fyodorov məlumat verib. Onun sözlərinə görə, xəsarət alanlardan biri xəstəxanaya yerləşdirilib, onun vəziyyəti ağır qiymətləndirilir. İlkin məlumata əsasən, ümumilikdə dörd nəfər xəsarət alıb.
Rusiya Federasiyası İstintaq Komitəsinin vilayət üzrə istintaq idarəsinin mətbuat xidmətindən bildirilib ki, Aleksin rayonunda göl yaxınlığında insanların həlak olması faktı ilə bağlı araşdırma aparılır. Hadisə yerinə baxış keçirilir, baş verənlərin təfərrüatları müəyyənləşdirilir.
Medianın məlumatına görə, ildırım nəm quma düşüb və yaxınlıqda olan bir neçə nəfəri elektrik cərəyanı vurub.
AZƏRTAC-ın xüsusi müxbiri
Moskva
Bölmənin digər xəbərləri
