“Ryanair” aviaşirkəti Almaniyada uçuşları ləğv edir
Berlin, 15 oktyabr, AZƏRTAC
İrlandiyanın aşağıbüdcəli aviaşirkəti “Ryanair” Almaniyada qış mövsümü üçün nəzərdə tutduğu uçuş planını xeyli ixtisar edəcək.
AZƏRTAC xəbər verir ki, şirkətin məlumatında əvvəlki planla müqayisədə təxminən 10 faiz az yerin satışa çıxarılacağı bildirilib.
Şirkət ümumilikdə 24 reysi və 800 min yeri ixtisar edəcək. Ən çox ixtisar Berlin-Brandenburq və Memminqen aeroportlarında olacaq. Berlində 5, Memminqendə isə 2 reys olmaqla hər şəhər üzrə 230 min yer ləğv ediləcək. Azalmaların çox olduğu şəhərlər arasında Köln (2 reys, 87 min yer), Baden-Baden (1 reys, 83 min yer), Frankfurt-Hahn (3 reys və 64 min) və digərləri də var. Şirkət, həmçinin Dortmund, Drezden və Leypsiqə uçuşları davam etdirməyəcək.
“Ryanair”in bu addımı Almaniyada hava nəqliyyatı üçün tətbiq edilən rüsumların, xüsusilə də verginin yüksək olmasına etiraz xarakteri daşıyır. Bununla belə, şirkət Almaniyada təxminən 7 milyon bilet təklif etməyi planlaşdırır. 2024-2025-ci ilin qış mövsümündə “Ryanair” Almaniyada 7 milyon 200 min sərnişin daşıyıb.
Aviaşirkət 2026-cı ilin yay mövsümündə də əlavə reyslərin ləğv edilməsini istisna etmir.
AZƏRTAC-ın xüsusi müxbiri
Berlin
Bölmənin digər xəbərləri
