“Sabah” qəzeti Türkiyə-Türkmənistan qaz sazişinin detallarını açıqlayıb
Ankara, 14 fevral, AZƏRTAC
Sutkada 28 milyon kubmetr qaz ötürmə qabiliyyətinə malik İran-Türkiyə boru kəmərinin istifadə olunmamış gücü 2025-ci il martın 1-dən Türkmənistan qazının Türkiyəyə tədarükü üçün istifadə olunacaq. Svop-sazişə əsasən, Tehran Türkiyəyə gündəlik ixrac edilən ilk 5 milyon kubmetr “mavi yanacağı” “türkmən” qazı kimi tanıyır.
AZƏRTAC xəbər verir ki, bu barədə yazan “Sabah” qəzetinə görə, türkmən qazı “bu gün Türkiyəyə tədarük edilən ən ucuz “mavi yanacaq” olacaq”.
“İlkin mərhələdə ilin sonunadək Türkmənistandan 1,3 milyard kubmetr qazın tədarükü Türkiyədə bir milyon yarım abonentin tələbatını ödəyəcək”, -deyə məqalənin müəllifi Okan Müderrisoğlu qeyd edir.
Jurnalist əmindir ki, Ankara üçün ideal variant Trans-Xəzər boru kəmərinin tikintisi olacaq. O qeyd edir: “Bu istiqamətdə ümid şüası Rusiya və İran arasında ildə 50 milyard kubmetr gücündə yeni qaz kəmərinin tikintisinə dair razılaşmadır. Türkmənistandan Azərbaycana analoji boru kəmərinin tikintisinə dair nümunədə olduğu kimi, onu da dəniz üzərindən çəkmək planlaşdırılır”. Məqalənin müəllifi hesab edir ki, Trans-Xəzər layihəsi Avropanın enerji bazarındakı vəziyyəti dəyişə bilər.
Ramin Abdullayev
AZƏRTAC-ın xüsusi müxbiri
Ankara
Bölmənin digər xəbərləri
