Sabirabadda səpinə start verilib - 11 min hektarda pambıq əkilməsi gözlənilir VİDEO
Sabirabad, 29 aprel, Aydın Yavərzadə, AZƏRTAC
Sabirabadda pambıq səpini ilə bağlı tarla görüşündə fermerlər və alimlər bir araya gəliblər. Onlar təcrübələrini paylaşıb və səpinlə bağlı müşahidələr aparıblar. Həmçinin sahədə orqanik gübrənin çiləmə üsulu ilə səpilməsi tətbiq edilib.
AZƏRTAC-ın bölgə müxbiri xəbər verir ki, Sabirabad rayonunun Zəngənə kəndində keçirilən tarla görüşündə Sabirabad Rayon İcra Hakimiyyətinin, Bitki Mühafizə və Texniki Bitkilər Elmi-Tədqiqat İnstitutunun, Sabirabad Dövlət Aqrar İnkişaf Mərkəzinin, pambıqçılıq şirkətlərinin rəsmiləri, Sabirabad və Saatlı rayonundan onlarla fermer iştirak ediblər. Tarla günündə həm ənənəvi, həm də qoşa cərgə üsulu ilə pambıq əkininə, həmçinin əkin zamanı torpağa gübrə verilməsi prosesinə baxış keçirilib.
Müzakirələrdə səpin zamanı istifadə edilməsi tövsiyə olunan yerli və xarici sortlardan bəhs edilib, pambıq becərilməsi zamanı qarşıya çıxan çətinliklər və həlli yolları diqqət mərkəzində olub. Yeni məhsuldar toxumlar təqdim edilib, yeni qaydada əkindən əvvəl çiləmə üsulu ilə torpağa orqanik gübrənin verilməsinin əhəmiyyətindən danışılıb. Tətbiq olunan qoşacərgə əkin üsulunun gələcəkdə daha da təkmilləşdirilib və geniş sahədə tətbiq edilməklə məhsuldarlığı artıra biləcəyi vurğulanıb.
Səpin zamanı innovativ üsullara üstünlük verən fermerlər bu il tarlalardan yüksək məhsul əldə etməyi planlaşdırırlar. Fermer Əfras Əsgərov deyir ki, yüksək məhsul əldə etmək üçün səpin üsulu aqreqatla həyata keçirilir və torpağa karbamid gübrəsi verilir. Digər gübrə isə çiləmə üsulu ilə verilən orqanik gübrədir. O, bu təcrübəni ötən il də tətbiq edib və hər hektardan 10 sentnerədək daha çox məhsul götürüb. Bu il 160 hektar sahəyə pambıq səpməyi nəzərdə tutan fermer, sahənin 80 faizə yaxınını ənənəvi üsulla və lifsiz toxumla, qalan hissəsini isə lifli toxumla və qoşa cərgə üsulu ilə əkməyi planlaşdırır.
Xosrov Cəfərov da Sabirabadın tanınmış pambıqçılarındandır, ötən illərin təcrübəsi sayəsində bu il daha çox pambıq əkməyi qərara alıb: “Ötən il 60 hektar sahədə pambıq becərdim, “Bəyaz Altun” sortundan olan toxum səpdim. Hər hektara 40-42 sentner məhsul yığdıq. Bu il isə eyni toxumla 90 hektar sahədə pambıq əkməyi qarşıya məqsəd qoymuşam. Hər hektara 120 kiloqram olmaqla toxum səpin aparırıq və səpinlə paralel torpağa gübrə veririk. Növbəti gübrə isə hər hektara 240 kiloqram olmaqla, suvarma ərəfəsində verilir. Cari ildə tarladan hər hektara 45 sentner məhsul əldə etmək əsas hədəfimdir".
"Azərpambıq-ASK" MMC-nin baş aqronomu Rafail Tahirov bildirib ki, şirkət tərəfindən Sabirabad və digər rayonlar üzrə ümumilikdə 4 mindən çox fermerlə 23 min hektardan artıq sahədə pambıq əkini üçün müqavilələr bağlanılıb. Səpin öncəsi aqrotexniki işlər yerinə yetirilib, bu günə kimi 13 min hektardan çox sahəyə toxum səpilib və 5 min hektarda çıxış əldə edilib. “Bu il əsasən tirə üsuluna üstünlük verilib. Bu üsulun üstünlüyü ondan ibarətdir ki, səpin vaxtı yağıntılar çox düşərsə torpaq üzərində qaysaq əmələ gəlmir və yaxşı çıxış alınır”.
Bitki Mühafizə və Texniki Bitkilər Elmi-Tədqiqat İnstitutunun şöbə müdiri Ələddin Tağıyev bildirib ki, pambıq səpini zamanı vacib şərtlərdən biri hava və torpaq şəraitinin nəzərə alaraq həmin bölgəyə uyğun toxumların düzgün seçilməsidir. “Pambıçıqlıda 125-130 gün vegetasiya müddəti olan yerli sort toxumların əkilməsi məqsədəuyğundur. Son illər yerli sortlardan olan “Gəncə-160”, “Gəncə-182” və “Gəncə 183” pambıq sortları fermerlər tərəfindən istifadə edilir. Bundan başqa, seleksiya yolu ilə yeni yerli sortlar da yaradılıb. Onlardan biri də institutun 100 illiyi ilə bağlı yaradılıb. Bu sort 42 faiz lif çıxımına və 45-50 sentner məhsuldarlığa malikdir. Eyni zamanda, “Gəncə-219” pambıq sortu da var ki, həmin sortu Kənd Təsərrüfatı Nazirliyinin Seleksiya Nailiyyətləri üzrə Ekspert Komissiyasına təqdim edəcəyik. Bu sort da məhsuldarlığı və lif çıxımı ilə seçilir. Yerli sort pambıqların digər bir üstünlüyü ondan ibarətdir ki, daha tez səpin aparmaq olur”.
Qeyd edək ki, bu il Sabirabadda 11 min hektara yaxın sahədə çiyid səpini gözlənilir. Artıq bu vaxtda kimi 4 min sahədə səpin aparılıb və may ayının ortalarına səpinin başa çatdırılması gözlənilir.
Bölmənin digər xəbərləri
