“Sağlam məktəbli” layihəsi çərçivəsində növbəti görüş keçirilib
Bakı, 1 may, AZƏRTAC
Qida Təhlükəsizliyi Agentliyi tərəfindən “Sağlam məktəbli” layihəsi çərçivəsində ümumtəhsil müəssisələrində maarifləndirmə tədbirləri davam etdirilir.
Agentliyin İnformasiya təminatı və innovativ həllər şöbəsindən AZƏRTAC-a verilən məlumata görə, layihə ilə bağlı növbəti görüş Bakı Şəhəri üzrə Təhsil İdarəsinin tabeliyindəki 207 nömrəli tam orta məktəbin şagirdləri ilə keçirilib.
Tədbirdə məktəblilərə agentliyin fəaliyyət istiqamətləri, eləcə də qida təhlükəsizliyinin təmin olunması və sağlam qidalanmanın vacibliyi barədə məlumatlar verilib. Daha sonra Qida Təhlükəsizliyi İnstitutunun mütəxəssisləri tərəfindən “Ayaq üstündə qidalanmaq və tələsik yemək gələcəkdə ciddi sağlamlıq problemlərinə yol açır”, “Uşaqlar fastfud qidalarını niyə xoşlayır?” və “Açıq şəraitdə satılan qidalar sağlamlıq üçün təhlükəlidir” mövzularında təqdimatlar edilib. Eləcə də, qida təhlükəsizliyi ilə bağlı hər hansı problemlə qarşılaşdıqda və ya sağlam qidalanma ilə əlaqədar suallar yarandıqda, agentliyin “1003 Çağrı Mərkəzi”nə müraciət edə biləcəkləri məktəblilərin diqqətinə çatdırılıb.
Görüşdə eyni zamanda mövzu ətrafında müzakirələr aparılıb, şagirdləri maraqlandıran suallar cavablandırılıb və onlara sağlam qidalanmaya dair maarifləndirici bukletlər paylanılıb.
Qeyd edək ki, “Sağlam məktəbli” layihəsi məktəblilər arasında sağlam qidalanmanın təşviq edilməsi, qida təhlükəsizliyi anlayışının təbliğ olunması və şagirdlərə qida təhlükəsizliyi vərdişlərinin aşılanması məqsədilə həyata keçirilir.
Bölmənin digər xəbərləri
