REGİONLAR
Sağlamlıq imkanları məhdud şəxslərin Naxçıvana gəzintisi təşkil olunub
Naxçıvan, 22 noyabr, AZƏRTAC
Ölkəmizin regionlarından olan sağlamlıq imkanları məhdud yüzə yaxın şəxsin muxtar respublikaya səfəri təşkil edilib.
AZƏRTAC-ın Naxçıvan bürosu xəbər verir ki, onlar Naxçıvan Diaqnostika Müalicə Mərkəzində, “Duzdağ” Fizioterapiya Mərkəzində və “Darıdağ” Arsenli Su Müalicəxanasında müalicə alıb, istirahət ediblər. Səfər çərçivəsində görüşlər keçirilib, qonaqlar muxtar respublikanın turizm əhəmiyyətli məkanları, tarixi abidələri, mədəniyyət müəssisələri ilə tanış olublar.
Azərbaycan milli memarlığının möhtəşəm abidəsi, Şərq memarlığı incilərindən olan Möminə Xatun türbəsi ilə tanışlıq qonaqlarda xoş təəssürat yaradıb. Bildirilib ki, bu möhtəşəm abidə 1186-cı ildə tikilib. Həmin dövrdə Azərbaycanın Atabəylər dövlətinin banisi Şəmsəddin Eldəniz həyat yoldaşı Möminə Xatunun məzarı üzərində məqbərə yaradılmasına qərar verib və bundan sonra məqbərə tanınmış memar Əcəmi Əbubəkr oğlu Naxçıvani tərəfindən tikilib. Nəinki Azərbaycan, bütövlükdə İslam memarlığında ən uca və incə kompozisiyalı türbələrdən olan Möminə Xatun türbəsi sərdabə və yerüstü hissələrdən ibarətdir.
Naxçıvan şəhərində yerləşən Açıq Səma Altında Muzeydə bildirilib ki, ən qədim insan yaşayış məskənlərindən olan Naxçıvanda sənətkarlıq və mədəniyyət də böyük inkişaf yolu keçib. Bu torpağın hər qarışı tarixin müəyyən dövründən soraq verir, əcdadlarımızın həyat tərzi və yaşayışı haqqında dolğun təəssürat yaradır. Əcdadlarımızın yaratdıqları daş abidələr, xüsusilə Gəmiqaya rəsmləri, ümumilikdə, bəşəriyyətin tarixindən xəbər verən dəyərli qaynaqlardır. Bu baxımdan Açıq Səma Altında Muzey də diqqəti cəlb edir. Muzeyin ekspozisiyasında mifoloji və dini dünyagörüşlə əlaqədar olan 226 qoç heykəli, daş kitabə, qəbirüstü abidə, daşla bağlı məişət əşyaları qorunur və nümayiş etdirilir. Bəşər tarixində daş əmək alətlərinin, daş heykəllərin, daş epiqrafik yazıların, piktoqrafik yazı nümunələrinin daş üzərində həkk edilməsinin tarixi çox qədimlərə dayanır. Açıq Səma Altında Muzeyin ən qədim eksponatı da eramızdan əvvəl IV-III minilliyə aid Gəmiqayadan gətirilmiş daş abidədir.
Sonra qonaqlar “Əshabi-Kəhf” Ziyarətgahı Dini-Mədəni Abidə Kompleksini ziyarət ediblər.
Ölkəmizin bölgələrindən gələcək sağlamlıq imkanları məhdud şəxslərin muxtar respublikada müalicəsi növbəti aylarda da davam etdiriləcək.