“ŞAHİN” HƏRBİ-İDMAN OYUNUNUN ZONA BİRİNCİLİYİ KEÇİRİLMİŞDİR
AZƏRTAC xəbər verir ki, mayın 5-də Bakı Şəhər Gənclər və İdman Baş İdarəsinin (BŞGİBİ) təşkilatçılığı ilə Cəmşid Naxçıvanski adına Hərbi Liseydə orta məktəblərin 9-11-ci sinif şagirdləri arasında “Şahin” hərbi-idman oyununun Bakı şəhəri üzrə zona birinciliyi keçirilmişdir.
Yarışların təntənəli açılış mərasimində Azərbaycan Respublikasının Dövlət himni səsləndirildikdən sonra gənclər və idman nazirinin müavini İntiqam Babayev, təhsil nazirinin müavini Elmar Qasımov, hərbi liseyin kurslar rəisi polkovnik Abdul Əzizov, BŞGİBİ-nin rəisi Məmmədhüseyn Dadaşov çıxış etmişlər. Bildirilmişdir ki, yarışın məqsədi Azərbaycan Prezidenti İlham Əliyev tərəfindən təsdiq edilmiş “Azərbaycan gəncliyi” Dövlət Proqamının icrasını təmin etməkdir. Vurğulanmışdır ki, orta məktəb şagirdlərini hərbi-idman oyunlarına geniş cəlb etməklə onların ordu sıralarında xidmətə hazırlanması və gənclərə vətənpərvərlik ruhunun aşılanmasın istiqamətində böyük işlər görülmüşdür.
Komandalara uğurlar arzulanmışdır.
Paytaxtın rayonları ilə yanaşı Şuşa, Laçın, Zəngilan rayonlarının da komandalarının iştirak etdiyi bu mərhələdə məktəblilər sıra hazırlığı, darağa patron doldurulması və boşaldılması, avtomatın sökülməsi və yığılması, tüfəngdən hədəfə atəş açmaq və s. üzrə öz bacarıqlarını nümayiş etdirmişlər.
Qalib komandalar “Şahin” hərbi-idman oyununun respublika finalında iştirak edəcəklər.
Bölmənin digər xəbərləri
