Şahin Seyidzadə: Ölkəmizdə ictimai-siyasi sabitliyin təməlində Ümummilli Liderin inkişaf strategiyası dayanır
Bakı, 10 dekabr, AZƏRTAC
Dünya tarixində böyük şəxsiyyətlər yaşayıb yaratdıqları, fəaliyyət göstərdikləri zamanlarda siyasi, iqtisadi və digər prosesləri öz xalqlarının rifahı naminə irəli aparmaqla adlarını əbədi olaraq tarixə yazırlar. Hər bir xalq öz tarixi şəxsiyyətləri ilə fəxr edir, onların yaratdığı dəyərlərə böyük ehtiramla yanaşır.
Bu, danılmaz həqiqətdir ki, Azərbaycan xalqının və dövlətinin tarixin səhnəsində özünəməxsus yer tutmaqla, gerçək müstəqilliyini qazanaraq qoruyub saxlamasını təmin edən məhz ulu öndər Heydər Əliyev olmuşdur.
Bu fikirləri AZƏRTAC-a açıqlamasında Milli Məclisin deputatı Şahin Seyidzadə söyləyib.
Deputat deyib ki, istər Azərbaycana başçılıq etdiyi bütün dönəmlərdə, istərsə də SSRİ kimi nəhəng və qüdrətli dövlətin ən yuxarı hakimiyyət eşelonunda yüksək rəhbər vəzifələr tutduğu vaxtlarda Heydər Əliyev xüsusi istedadı və özünəməxsus idarəçiliyi baxımından həmişə fərqlənmişdir.
İnsanları müəyyən bir ideya ətrafında və məqsəd uğrunda birləşdirə bilmək, yarana biləcək bütün mümkün çətinlikləri öncədən görmək və onların həllinə əvvəlcədən hazır olmaq qabiliyyəti Heydər Əliyevin xarakterik xüsusiyyəti idi. Ulu Öndər bu baxımdan bir çox dünya liderləri və rəhbərlərindən hər zaman fərqlənirdi. Ümummilli Lider, eyni zamanda, liderlik və idarəçilik xüsusiyyətlərini özündə birləşdirən fenomenal şəxsiyyət idi.
“Tarixən bir çox nüfuzlu liderlərin uğur qazanması, rəhbərlik etdiyi toplumu, xalqı böyük fəlakət və faciələrdən qoruma bacarığı məhz onun anadangəlmə fitri istedad və uzaqgörənliyin nəticəsi olmuşdur. Ulu öndər Heydər Əliyevin xalqımızın qəlbində əsrlər boyu yaşamış müstəqillik ideyaları ilə qovuşması XX əsrin son onilliklərində Azərbaycanın milli yüksəlişinin əsası kimi özünü büruzə vermişdir. Bunun əyani misalını sovet rejiminin ən sərt çağlarında ölkəyə rəhbərlik edən Heydər Əliyevin milli ruhun inkişafına təkan verən cəsarətli addımlarında görmək o qədər çətin deyil”, - deyən Ş.Seyidzadə əlavə edib ki, Ümummilli Liderin idarəçilik istedadı, tükənməz enerjisi və misilsiz işgüzarlığı SSRİ-nin dövlət başçılarından biri kimi fəaliyyət göstərdiyi və ümumittifaq respublikaları arasında ən böyük layihələrə rəhbərlik etdiyi vaxtlarda da özünü parlaq surətdə təzahür etdirmişdir. O, ölkədə baş verən ən ekstremal vəziyyətlərin aradan qaldırılmasının bilavasitə iştirakçısı olması sayəsində dövlətin ən nüfuzlu siyasi xadimlərindən birinə çevrilmişdi.
Deputat vurğulayıb ki, ulu öndər Heydər Əliyevin hakimiyyətinin birinci dövründə yaradılmış iqtisadi potensial sonrakı mərhələlərdə - müstəqillik illərində Azərbaycan üçün çox əhəmiyyətli rol oynadı. Hakimiyyəti illərində Ulu Öndərin həyata keçirdiyi daxili siyasət sayəsində ölkəmizdə milli özünüdərk, özünəqayıdış, vətənpərvərliyin gücləndirilməsi baxımından əhəmiyyətli addımlar atıldı.
Xalqın tələbi ilə ikinci dəfə hakimiyyətə gələn Ulu Öndər 1993-cü ildən başlayaraq ölkəni düşdüyü xaosdan, parçalanma təhlükəsindən xilas etdi. Heydər Əliyev Azərbaycan tarixinə öz adını xilaskar dövlət başçısı kimi yazdıraraq ölkəmizin təhlükəsizliyinin qarantı kimi tarixə düşdü.
Ermənistanın Azərbaycana hərbi təcavüzü və daxildə hakimiyyət çəkişməsi nəticəsində yaranmış vəziyyət məhz Ulu Öndərin uzaqgörənliyi, yaranmış çətin vəziyyətin anında analiz edərək xalqın rifahı naminə düzgün qərarvermə qabiliyyəti xilas etdi.
Təsadüfi deyil ki, Ümummilli Liderin 1993-cü ildə hakimiyyətə yenidən qayıdışı ilə milli birliyin təmin edildiyi gün tarixidə Milli Qurtuluş günü kimi həkk olmuşdur. Bütün bu hadisələrin fonunda ölkədə yeni “Təhlükəsizlik indeksi” anlayışı formalaşmağa başladı.
“Ölkəmizdə ictimai-siyasi sabitliyin qorunmasının, mövcud iqtisadi inkişafın, hərtərəfli tərəqqinin təməlində ümummilli lider Heydər Əliyevin inkişaf strategiyası, Onun müəyyənləşdirdiyi daxili və xarici siyasət xətti dayanır. Məhz bu siyasi xəttin davamlı tətbiqi və inkişafı sayəsində Azərbaycan dünyada nüfuz özünəməxsus yeri olan lider ölkə kimi formalaşmışdır”, - deyə Ş.Seyidzadə vurğulayıb.
Bölmənin digər xəbərləri
