Şahmat üzrə Qran-Pri turnirində Günay Məmmədzadə gürcüstanlı rəqibi ilə heç-heçə edib
Bakı, 26 may, AZƏRTAC
Cəbəllütariqdə qadın şahmatçılar arasında Qran-Pri turnirinin beşinci turunun oyunları keçirilib.
AZƏRTAC xəbər verir ki, yarışda ölkəmizi təmsil edən Günay Məmmədzadə gürcüstanlı Nana Dzaqnidze ilə mübarizə aparıb. Qarşılaşma heç-heçə ilə başa çatıb. Turun digər oyunlarında rusiyalı şahmatçılar Valentina Qunina qazaxıstanlı Dinara Saduakassovaya qalib gəlib, Katerina Laqno ukraynalı Anna Muzıçuk ilə heç-heçə edib, Alina Kaşlinskaya isə almaniyalı Elizabet Paetsə uduzub. Ukraynanın digər təmsilçisi Mariya Muzıçuk rumıniyalı İrina Bulmaqaya qalib gəlib. Bolqarıstanlı Antoaneta Stefanova isə qazaxıstanlı Jansaya Abdumalikə uduzub.
Ötən 5 turun nəticələrinə görə, G.Məmmədzadə 5-7-ci yerləri bölüşür. Turnir cədvəlinə 4 xalla Jansaya Abdumalik başçılıq edir. On bir turdan ibarət turnirə iyunun 2-də yekun vurulacaq.
Bölmənin digər xəbərləri
