Şair və yazıçı Asim Yadigar “Naxçıvan” Universitetinin tələbələri ilə görüşüb
Naxçıvan, 29 aprel, AZƏRTAC
“Naxçıvan” Universitetində Naxçıvan Muxtar Respublikası Yazıçılar Birliyinin sədri, yazıçı-şair, dramaturq, publisist Asim Yadigarla görüş keçirilib.
Universitetin mətbuat xidmətindən AZƏRTAC-ın Naxçıvan bürosuna bildirilib ki, tədbirdə çıxış edən ali təhsil ocağının rektoru, dosent Nurlana Əliyeva muxtar respublikada ədəbiyyatın inkişafına göstərilən diqqət və qayğıdan bəhs edib.
Rektor deyib ki, Azərbaycan ədəbiyyatının çoxəsrlik inkişaf tarixində Naxçıvan ədəbi mühitinin özünəməxsus yeri var. İstər ədəbi-bədii yaradıcılıq, istərsə də elmi-tədqiqat sahəsində naxçıvanlı qələm sahibləri həmişə öz sözlərini deyib, ədəbiyyatşünaslığımıza layiqli töhfələr veriblər. Bu sahədə Asim Yadigarın özünəməxsus yeri və rolu var. Asim Yadigar Azərbaycan ədəbiyyatının inkişafında, gənclərimizə vətənpərvərlik duyğularının aşılanmasında və yeni ədəbi gəncliyin yetişməsində mühüm xidmətlər göstərib. Onun müxtəlif vəznlərdə 600-dən çox şeiri çap edilib. Müəllifin heca, əruz və sərbəst vəzndə yazdığı şeirləri sübut edir ki, şair hər bir vəzndə gözəl nümunələr yaratmaq imkanına malikdir. Bu baxımdan onun rübailəri, qəzəlləri, təxmisləri, məsnəviləri klassik şeir nümunələri kimi böyük maraq kəsb edir.
Asim Yadigarın qoşma və gəraylıları, təcnisləri də onun bir şair kimi xalq şeiri formalarında da olduqca məharətli olduğunu, buna görə də gözəl sənət nümunələri yaratdığını vurğulayan Nurlana Əliyeva qeyd edib ki, şairin müxtəlif illərdə işıq üzü görən “Zirvə yolu”, “Unut bu sevdanı”, “Oğul dağı”, “Hər şeyin sonu var”, “Midiyanın süqutu”, “Sənətinin vurğunu”, “Bahar”, “Kalba Musa çeşməsi”, “Bir nurlu heykəl yarat”, “Bir ömrün nəğməsi” və digər əsərləri oxucular tərəfindən maraqla qarşılanıb. Yaradıcılığında ümummilli lider Heydər Əliyevə həsr olunan “Heydər zirvəsi”, “Dədə Heydərim mənim” və “Gəldi ulu Heydərin İlham dühası, gəldi”, “Bir nurlu heykəl yarat”, “Azərbaycan dünyaya günəş kimi doğacaq”, “Azərbaycan bayrağına”, “Bir bayraq altında”, “Vətən oğlu”, “Döyüş əmri ver mənə” və digər şeirləri bu gün Naxçıvan ədəbi mühitində siyasi lirikamızın gözəl nümunələrindəndir.
Sonra filologiya üzrə fəlsəfə doktoru, dosent İman Cəfərli şairin həyat yolu və yaradıcılığı haqqında geniş məlumat verib. Tədbirdə müəllifin uşaqlar üçün yazdığı yüzə yaxın şeiri, ona yaxın poeması və dram əsərləri haqqında da iştirakçılara məlumat verilib, “Torağayın qisası”, “Midiyanın süqutu”, “Qorxulu oyun”, “Şir və çaqqal”, “Buynuzlu ana maral” və digər dram əsərlərinin mövzu və ideya, bədi-estetik xüsusiyyətlərindən söz açılıb.
Görüşdə çıxış edən Naxçıvan Muxtar Respublikası Yazıçılar Birliyinin sədri Asim Yadigar tədbirin təşkili üçün universitet rəhbərliyinə minnətdarlıq edib. Əsərlərinin yazılma tarixindən, unudulmaz xatirələrindən danışan yazar qeyd edib ki, 6 pyes, 18 roman, 600-ə yaxın şeir, xeyli sayda kitab müəllifi kimi gənclərin əhatəsində olmaq həmişə xoş təəssürat yaradır. Asim Yadigar ən sevilən şeirlərindən bir neçəsini səsləndirdikdən sonra tələbələrin suallarını cavablandırıb. Müəllif daha sonra kitablarından bəzilərini iştirakçılara hədiyyə edib.
Sonda universitet adından Asim Yadigara hədiyyə təqdim olunub.
Bölmənin digər xəbərləri
