Salyandakı Tarix-Diyarşünaslıq Muzeyində 900 il yaşı olan tütək saxlanılır
Salyan, 11 fevral, Mahir Babayev, AZƏRTAC
Salyandakı Tarix-Diyarşünaslıq Muzeyində gildən hazırlanan qədim tütək saxlanılır. Tədqiqatçıların fikrincə, həmin tütək ən azı 900 il bundan əvvəl hazırlanıb.
AZƏRTAC-ın bölgə müxbiri xəbər verir ki, bu maddi-mədəniyyət nümunəsi ötən əsrin 80-ci illərində rayon ərazisindəki Marışlı, Noxudlu və Qırxçıraq qədim yaşayış məskənlərində arxeoloji qazıntılar aparılarkən tapılıb.
Qədim musiqi aləti muzeydə toplanan 10 mindən çox eksponatın demək olar ki, ən kiçiyidir. Onun uzunluğu 6 santimetrə yaxındır.
İlk baxışdan müasir tütəklərdən fərqlənsə də, ifa zamanı bu alət yenilərindən heç də geri qalmır. Nəfəsli alətlərin ifaçısı Mirağa Abdullayev bildirib ki, qədim gil-tütəyin müasir zurna, balaban və tütəkdən fərqi onun ikinci notunun olmasıdır. Bu da ifa zamanı bəzi çətinliklər yaradır. Bu aləti səsləndirmək üçün bacarıqla yanaşı, gərək musiqi duyumun da ola.
Bölmənin digər xəbərləri
