Şamaxıda karantin qaydalarını pozan çayxana aşkar edilib
Bakı, 6 yanvar, AZƏRTAC
Şamaxıda xüsusi karantin rejimi qaydalarını pozaraq gizli fəaliyyət göstərən çayxana aşkar edilib.
Daxili İşlər Nazirliyinin mətbuat xidmətinin Şəki regional qrupundan AZƏRTAC-a bildiriblər ki, Şamaxı Rayon Polis Şöbəsinin əməkdaşları tərəfindən keçirilən tədbir zamanı rayon sakini Ağacəfər Manafovun şəhər ərazisində yerləşən və ona məxsus çayxananı qanunsuz işlətdiyi məlum olub. Obyektə baxış zamanı oradakı müştərilərin xüsusi karantin rejimi qaydalarını pozduqları müəyyən edilib.
Karantin qaydalarını pozan müştərilər barəsində İnzibati Xətalar Məcəlləsinin 211-ci maddəsi ilə protokol tərtib edilib və onlar cərimələniblər. Obyekt sahibi barəsində toplanmış materiallar hüquqi qiymət verilməsi üçün rayon məhkəməsinə göndərilib.
Bölmənin digər xəbərləri
