Sanksiyalara baxmayaraq, Rusiyanın iki sərnişin təyyarəsi Finlandiya üzərindən uçub
Bakı, 30 may, AZƏRTAC
Avropa İttifaqının sanksiyalarına baxmayaraq, mayın 29-da Rusiyanın iki sərnişin təyyarəsi qasırğadan yayınmaq üçün Finlandiya üzərindən uçub.
AZƏRTAC “Helsingin Sanomat” nəşrinə istinadla xəbər verir ki, “Pobeda” və “Aeroflot” aviakompaniyalarına məxsus həmin təyyarələr Moskva-Kalininqrad reysini yerinə yetirirdi.
“Mən bunun baş verdiyini təsdiq edə bilərəm. Rusiya təyyarələri qasırğadan yayınmaq üçün bir müddət Finlandiya hava məkanına daxil olub”, - deyə hava hərəkətinə nəzarət üzrə “Fintraffic” kompaniyasının nümayəndəsi Leena Huhtamaa bildirib.
Xatırladaq ki, Ukraynada apardığı müharibə və Avropa İttifaqının müvafiq sanksiyaları səbəbindən Rusiya təyyarələrinə Finlandiya və Aİ ölkələrinin hava məkanından istifadə etmək qadağan olunub. Lakin fövqəladə hallar zamanı istisnalar ola bilər.
Bölmənin digər xəbərləri
