Bakı, 11 iyun, AZƏRTAC

Böyük Britaniyanın “Sky Sports” telekanalının jurnalistləri Formula 1 çempionatının Azərbaycan Qran-Prisində çıxış etmiş pilotları on ballıq şkala üzrə dəyərləndiriblər.

AZƏRTAC həmin dəyərləndirməni təqdim edir.

SERXİO PERES: 9

Serxio Peres deyirdi ki, “Red Bull”a alışmaq üçün ona 5 yürüş lazımdır. Meksikalı bu uik-enddə növbəti sürəti işə salmağa nail oldu. Əlbəttə ki, onun rəqibinin şinlə bağlı ciddi problemi olmasaydı, o, yürüşü qazana bilməyəcəkdi. Lakin gördüyü bütün gərgin işdən sonra Serxio bu nəticəyə layiq idi.

Serxio restartda rəqibini irəli buraxmamaq üçün əlindən gələni etdi. Sonra hidravlikada yaranan problemə baxmayaraq, bolidi finişə çatdırdı. Karyerasında ikinci, “Red Bull”da birinci qələbə. Bravo, Serxio!

SEBASTİAN FETTEL: 9,5

Son həftələr Sebastian Fettel üçün əlamətdar oldu. İki şəhər halqasında o, özünü parlaq şəkildə xatırlatdı: Monakoda beşinci və Bakıda ikinci yer yaşıl maşının sükanı arxasında onun karyerasını yenidən işıqlandırdı.

Bakıda Sebastian son günlər ərzində daha yaxşı formada idi. Təsnifat yürüşünün finalında yaxşı çıxış etməsinə baxmayaraq, o, sakitliyini qoruyub saxlayır və yürüşü əminliklə aparırdı.

Maks Ferstappen oyundan kənarlaşandan, Luis Hemilton isə restartda səhvə yol verdikdən sonra Fettelin bütün səyləri hədər getmədi. Azarkeşlər onu “Günün yürüşçüsü” adlandırdılar, belə seçimlə mübahisə etmək çətin məsələdir.

PYER QASLİ: 9

Yürüş qarmaqarışıqlığa çevrilən kimi Pyer Qasli dərhal bundan istifadə edir. Lakin elə fikirləşməyin ki, Bakıda fransalının bəxti gətirib. O, bütün uik-end boyunca yüksək sürət nümayiş etdirib.

Qasli yekun məşqdə yaxşı vaxt nəticəsi göstərdi, sonra isə təsnifatda 4-cü oldu. Bununla da o, karyerasında ən yaxşı nəticəni təkrarladı. Startdakı düz yolda Pyer möhtəşəm mübarizədə Şarl Lekleri geridə qoydu, daha sonra “Ferrari”nin pilotunu arxada saxlaya bildi. Hər şeyə rəğmən o, nəticələrə nail olmaqda davam edir.

ŞARL LEKLER: 8,5

Şarl Lekler hələ startdan əvvəl bilirdi ki, Ferstappeni və Hemiltonu geridə saxlamaq çətin olacaq. Yürüşdən daha çox təsnifat mərhələsinə daha yaxşı hazırlanan “Ferrari” sükanı arxasında Lekler irəli getməkdən daha çox müdafiə olunurdu.

Şənbə günü Şarl yenidən yaxşı çıxış etdi. O, yürüşdən sonra azacıq məyusluq hiss edə bilərdi. Lakin bu, Monakoda olan nəticə ilə müqayisədə açıq-aşkar yaxşı nəticə idi.

LANDO NORRİS: 8

Bakı uik-endi Lando Norris üçün əsl “Amerika təpələri” oldu. Finişdə 5-ci olmaq Landonun “McLaren”də nə dərəcədə sabit olmasını nümayiş etdirir.

Lando startda daha üç mövqe itirərək onluqdan uzaqlaşdı. Daha sonra uduzduğunu geri alaraq Yuki Tsunodanı ötdü və finişdə 5-ci oldu.

FERNANDO ALONSO: 8,5

Biz Bakıda əvvəlki Fernando Alonsonu gördük. İspaniyalı uik-end boyunca ilk onluqda idi, finişə 6-cı çatması isə onun qayıdışından sonra ən yaxşı nəticəsi oldu.

Əgər iki final dövrəsinin yekunlarına görə ən yaxşı pilotu seçmiş olsaydıq, bu, Alonso ola bilərdi. Gözəl çıxış idi.

YUKİ TSUNODA: 7,5

Monako mərhələsindən sonra “AlphaTauri”də qərara aldılar ki, Yuki Tsunoda bazanın yaxınlığında yaşamaq məqsədilə İtaliyaya köçməlidir. Yaponiyalı pilot simulyatorda xeyli işləyib və bu hazırlıq özünü göstərdi.

Tsunoda Bakıda ortağını keçə bilməsə də, karyerasında ilk dəfə olaraq təsnifat finalına çıxdı, finişdə 7-ci yer isə onun karyerasında ən yaxşı nəticə oldu.

Təsnifat finalında bolidi əzən Tsunoda finişdən sonra bildirib ki, son dövrələrdə iki mövqe itirməsinə görə pərişandır. Lakin şübhə yoxdur ki, o, irəliləyişə nail olub.

KARLOS SAYNS: 6

Bu, Karlos Sayns üçün məyusedici uik-end oldu. O, 8-ci yerdən daha yaxşı nəticə qazana bilərdi.

Karlos yürüşün 11-ci dövrəsində səhvə yol verdi. O, tormozlamada ön təkərləri blok edərək, 8-ci döngədə bolidi “cib”ə sürdü. Bu, Saynsın uik-enddə ikinci səhvi idi. Bu vaxtadək ispan təsnifat finalında maşını əzmişdi. Bazar günü buraxdığı səhv ona baha başa gəldi və o, cəmi bir neçə xal qazana bildi.

DANİEL RİKKARDO: 6,5

Ötən illərdə Bakı mərhələlərində qarışıqlıqdan öz xeyrinə məharətlə istifadə edən pilot bu bazar günü cəmi 2 xalla kifayətləndi. Daniel ən azından Monako ilə müqayisədə daha yaxşı çıxış etdi.

Bu mövsümdəki təsnifat yarışlarında çıxışlar avstraliyalının çox da güclü tərəfi deyil. Norrislə müqayisədə onun problemi daha çox idi, o da təsnifatın ikinci hissəsində bolidi əzmişdi.

Daniel yürüşdə mübarizə aparmağa davam etdi və finiş xəttini 9-cu keçdi. Təəssüf ki, belə təsnifatdan sonra bu, onun nəzərdə tutduğu maksimum idi.

KİMİ RAYKKONEN: 7,5

İmolada 9-cu yerdən məhrum olan Kimi Raykkonen 2021-ci ildə özünün ilk xalını qazandı.

“Son iki dövrəyədək mənim yürüşümdə praktik olaraq heç nə baş vermirdi”, - deyə Kimi finaldan sonra bildirib. Finlandiyalı təsnifat yürüşündə bolidini əzmiş ortağını geridə qoydu. Yürüşdə isə rəqiblərini üstələyən Kimi digər pilotların problemlərindən istifadə edərək mövqeyini möhkəmlətdi. Bakı mərhələsi onun inamlı çıxışı və karyerasında 216-cı finişi idi.

ANTONİO COVİNATSİ: 6,5

Antonio Covinatsi yürüşdə xal qazanmağa yaxın idi, lakin o, restartda Kimini özündən irəli buraxdı.

20-ci mövqedən start götürən Covinatsi birinci dövrədə 6 yer qazandı, daha sonra Karlos Sayns ilə gözəl duel apardı.

VALTTERİ BOTTAS: 4

Luis Hemiltonun restartda yol verdiyi səhv daha yaddaqalan oldu. Lakin o, ən azından W12 avtomobilinın də sürətli olduğunu nümayiş etdirdi. Valtteri Bottasın isə bütün uik-end boyunca sürəti yox idi. Görünür, Valtteri üçün bu, Formula 1 çempionatında bütün karyerası ərzində onun rəqabət qabiliyyətinin ən aşağı səviyyədə olduğu mərhələ idi.

Ortağından fərqli olaraq Bottas münasib sazlama tapa bilmədi və təsnifatda yalnız 10-cu yerdə qərarlaşdı. Yürüşdə onun sürəti daha pis idi və o, orta qruplardan olan, hətta “Alfa Romeo” komandasını belə ötə bilmədi.

MİK ŞUMAXER: 7

Mik Şumaxerin radiodanışıqlarda təmkinliyi hələ də onun fərqli xüsusiyyətidir. Lakin Bakıda düz məsafədə 13-cü yer uğrunda mübarizə aparanda ortağının qəfil manevri hətta Miki də qəzəbləndirdi.

Təhlükəsizlik avtomobilinin trasda olduğu anda pit-stopda yaranan problemlər Mikə mane olsa da, o, yürüşü yaxşı aparırdı. Restartda Nikita Mazepin Miki geridə qoydu, lakin sonra alman pilot mövqeyini özünə qaytardı.

NİKİTA MAZEPİN: 5,5

Finişə Luis Hemiltondan əvvəl, 14-cü yerdə çatmaq? Uik-enddən əvvəl Nikita Mazepin yəqin ki, bu nəticə ilə razılaşardı.

Formula 1 çempionatının Azərbaycan Qran-Prisi rusiyalı pilot üçün çətin oldu. Təsnifat yürüşündə o, yenə də ortağına güzəşt etdi, yürüşdə bir neçə səhvə yol verdi. Təhlükəsizlik avtomobili və qırmızı bayraqlarla onun bəxti gətirdi, onların sayəsində Mazepin pelotona çata bildi.

Restartdan sonra Mazepin az qala ciddi qəza törədəcəkdi: o, düz yolda Mik Şumaxeri irəli buraxmamağa cəhd göstərirdi.

NİKOLAS LATİFİ: 6

Nikolas Latifi üçün heç də şən yürüş deyildi. Finişdən sonra o, özünü “tənha” hiss etməsi barədə fikirlərini bölüşüb.

Bütün bunlarla yanaşı, onun komandası qırmızı bayraqlar qaldırılan zaman ona trasda qalmağı məsləhət görməklə səhvə yol verdilər. Bu səbəbdən aldığı cərimə Nikolasın restartda xal qazanmağa bütün ümidlərini puça çıxardı.

LUİS HEMİLTON: 6,5

Luis Hemilton özü üçün səciyyəvi yürüş aparırdı, lakin hər şey “Mercedes”in pilotu üçün qeyri-xarakterik başa çatdı: həlledici anda kobud səhv və xalsız finiş.

Uğursuz cümə günündən sonra “Mercedes” və Hemilton şənbə və bazar günləri möcüzələr yaratdılar. “Red Bull”un sürətinin yüksək olmasına baxmayaraq, Ferstappenin oyundan çıxması Luisə çempionatda liderliyi qaytarmaq üçün gözəl fürsət verdi.

Lakin Luis bu şansı əldən buraxdı, əyləclərin sazlamasına cavabdeh olan sükanaltı rıçaqı səhvən qoşdu. Əgər bu xəta olmasaydı, o, öz çıxışına görə reytinqdə sözsüz 9 bal toplaya bilərdi.

CORC RASSEL: 7

Ötürmə qutusunun nasazlığı Corc Rasselin sonda “mini-yürüş”də iştirakına imkan vermədi.

Corc ondan gözlənilən hər şeyi etdi: təsnifatın ikinci hissəsinə çıxdı və yürüşdə inadla mübarizə apardı.

MAKS FERSTAPPEN: 9

Maks Ferstappen və Bakı: o qədər də yaxşı dostlar deyil.

Bakıda podiuma qalxmaq Maksa hələ də nəsib olmayıb. Bazar günü finişə beş dövrə qalmış baş verən partlayış onu dayanmağa məcbur etdi. Taleyin qismətindən, bu vaxtadək Maksın şinlərlə bağlı problemləri ondan arxada gələn rəqiblərinə nisbətən daha az olub və o, yürüşü Luis Hemiltona məxsus tərzdə aparıb. Şinin partlama səbəbi nə olursa-olsun, Maks Azərbaycandan qazanılmayan xalla getdi.

Lakin Hemiltonun gözlənilməz səhvi sayəsində Ferstappen liderliyi qoruyub saxlaya bildi.

LENS STROLL: 6,5

Yürüş Lens Stroll üçün yaxşı gedirdi. Kanadalı təsnifat yürüşündə qəza səbəbindən 19-cu yerdən start götürəndən sonra uzun məsafəli yolun birinci hissəsində “Hard” şinlərində yaxşı sürət nümayiş etdirdi.

Stroll yəqin ki, xal qazana bilərdi, lakin uik-end qəza ilə başa çatdı. Kanadalı bu qəzanın səbəbini arxa şinin partlamasında gördü. Güclü zərbə və gərgin işdən sonra mərhələnin üzücü sonu.

ESTEBAN OKON: 6

Esteban Okon təsnifat yarışında Fernando Alonsoya güzəşt etdi, yürüşdə isə onun itirdiyini geri qaytarmaq şansı yox idi. Onun mübarizəsi cəmi bir neçə dövrə davam etdi, sonra isə “Alpine”nin pilotu güc itirilməsi səbəbindən oyundan kənarlaşdı.