Səfir Bilal Haye: Azərbaycan Pakistan xalqının qəlbində xüsusi yeri olan ölkədir
Bakı, 18 dekabr, Səadət Hakıyeva, AZƏRTAC
Pakistan Azərbaycanı müstəqil dövlət kimi tanıyan ilk ölkələrdən biridir. 1993-1994-cü illərdə BMT Təhlükəsizlik Şurasının qeyri-daimi üzvü olan Pakistan qurumda Azərbaycanın Qarabağ məsələsində mövqeyi üçün hüquqi baza yaradan müxtəlif qətnamələrinin qəbul edilməsində mühüm rol oynayıb. Pakistan dünyada Ermənistanı dövlət kimi tanımayan yeganə ölkədir. Pakistanla Azərbaycan arasında hərbi əməkdaşlıq 2005-ci ildən sonra daha da genişlənməyə başlayıb.
Bu fikirləri AZƏRTAC-a müsahibəsində Pakistan İslam Respublikasının Azərbaycan Respublikasındakı fövqəladə və səlahiyyətli səfiri Bilal Haye ifadə edib.
Pakistan və Azərbaycanı bir-birinə ümumi inam və istək bağladığını qeyd edən səfir deyib: “Ölkələrimiz arasında əlaqələr dərin köklərə malikdir. Əcdadlarımız qədim İpək Yolu ilə ticarət zamanından tərəfdaş olublar. Bakıda, İçərişəhərdə Multanı karvansarasının mövcudluğu bizim tarixi əlaqələrimizin göstəricisidir.
Pakistan ilə Azərbaycan arasında hərbi əməkdaşlıq əlaqələrindən bəhs edən Bilal Hayenin bildirib ki, rəsmi İslamabadın Ermənistanla bağlı mövqeyi qardaş ölkələr olan Türkiyə və Azərbaycanın mövqeyi ilə bağlıdır. Əgər Türkiyə və Azərbaycanın Ermənistanla münasibətləri normallaşarsa, Pakistan da bu ölkə ilə bağlı mövqeyini nəzərdən keçirə bilər.
Pakistan, Azərbaycan və Türkiyə parlamentlərinin sədrlərinin cari ilin iyulunda imzaladıqları Bakı Bəyannaməsinin əhəmiyyətindən danışan diplomat bu sənədin üç qardaş ölkənin parlamentlərinin və xalqlarının daha da yaxınlaşmasına töhfə verəcəyinə inandığını vurğulayaraq deyib: “Bakı Bəyannaməsi müvafiq dövlətlərin siyasi və iqtisadi əməkdaşlıq üzrə həmrəyliyini, bütün sahələrdə əməkdaşlığı dərinləşdirmək istəyini bir daha təsdiq edir. Azərbaycan, Pakistan və Türkiyə parlamentləri sədrlərinin üçtərəfli görüşünü 2017-ci ildə Azərbaycanın təşəbbüsü ilə xarici işlər nazirlərinin Bakıda keçirilmiş ilk üçtərəfli görüşünün davamı kimi qiymətləndirmək olar”.
Səfir vurğulayıb ki, Azərbaycanın dost ölkələri işğaldan azad edilmiş ərazilərə sərmayə qoymağa dəvət etməsi təqdirəlayiq addımdır. Pakistan şirkətləri bu imkanlar barədə mütəmadi olaraq məlumatlandırılır. Bəzi şirkətlər artıq Azərbaycana səfər ediblər. Ümid edirəm ki, daha çox Pakistan şirkəti fürsətləri real olaraq görmək üçün Azərbaycana gələcək. Diplomat deyib ki, hazırda bərpa olunan enerji və infrastruktur layihələrində, eləcə də əczaçılıq və toxuculuq sənayesində investisiya imkanları nəzərdən keçirilir.
Dekabrın 19-da İslamabadda İslam Əməkdaşlığı Təşkilatı (İƏT) xarici işlər nazirlərinin növbədənkənar görüşü barədə danışan Bilal Haye qeyd edib ki, tədbirdə Əfqanıstandakı humanitar böhranla bağlı məsələlər müzakirə olunacaq. Görüşün İƏT-in Sammitinin hazırkı sədri olan Səudiyyə Ərəbistanının tövsiyəsi ilə çağırıldığını bildirən diplomat deyib: “Məlum olduğu kimi, bu ilin avqustunda beynəlxalq qüvvələr Əfqanıstandan çıxarıldıqdan sonra bu ölkəyə iqtisadi yardımlar dayandırılıb və onun milli aktivləri dondurulub. Bu, ölkədə dəhşətli humanitar böhranlara səbəb olub. Bir çox beynəlxalq hesabatlara görə, Əfqanıstanda uşaqlar və qocalar da daxil olmaqla, milyonlarla insan kəskin qida və tibbi ləvazimat çatışmazlığı ilə üzləşib. Əgər əfqan xalqına dərhal lazımi humanitar yardım göstərilməsə, nəhəng insan tələfatı təhlükəsi var. İslamabadda Əfqanıstana lazımi humanitar yardımın göstərilməsi yollarını müəyyənləşdirmək üçün İƏT-ə üzv dövlətlərin və beynəlxalq maliyyə institutlarının nümayəndələrinin fikirlərini öyrənəcəyik”.
Ötən ilin sentyabrından Azərbaycanda səfir kimi fəaliyyət göstərdiyini deyən B.Haye qeyd edib: “Bakı şəhəri və Azərbaycan xalqı məni çox mehriban qarşıladı. Bura mənim üçün ikinci evimdir. Azərbaycan Pakistan xalqının qəlbində xüsusi yeri olan ölkədir. Mən Azərbaycan xalqının da bizə qarşı güclü sevgi hissinin olduğunu gördüm və bu bağlılıq əlaqələrimizi çox xüsusi edir. Evlərin eyvanlarından Azərbaycan bayraqları ilə bərabər Pakistanın dövlət bayrağının da asılması qürurvericidir və xalqlarımızın bir-birinə olan sevgi və ehtiramının göstəricisidir.
Bölmənin digər xəbərləri
