Sentyabrın 24-də Azərbaycan Prezidenti İlham Əliyev Gəncədə şəhər ictimaiyyətinin nümayəndələri ilə görüşmüşdür.

Gəncə şəhər təhsil idarəsinin metodik mərkəzinin direktoru AFAQ ƏLİYEVA dövlətimizin başçısını salamlayaraq dedi:

-Cənab Prezident, Sizi Gəncədə görmək bizim üçün çox sevindirici bir haldır. Gəncəyə, gəncəlilərə göstərdiyiniz qayğı və diqqətin nəticəsidir ki, bu gün şəhər belə inkişaf edir, gözəlləşir. Sizin hər gəlişiniz, verdiyiniz göstərişlər, tapşırıqlar sayəsində Gəncəmiz günü-gündən abadlaşır. Gəncəmiz öz tarixi yaddaşını qoruyub saxlayaraq müasirləşir.

Sizin bugünkü gəlişiniz təşəbbüskarı olduğunuz Şəhər gününə təsadüf edir. Məhz Sizin tapşırığınızla bərpa edilən Gəncə darvazalarının açarını Sizə təqdim etmək istəyirəm. Bu açar Gəncə Regional Elm Mərkəzinin sənətkarları tərəfindən qədim eskizlər əsasında hazırlanmışdır. Bu, əslində təkcə Gəncə darvazalarının açarı deyil, biz gəncəlilərin qəlbinin açarıdır.

Prezident İLHAM ƏLİYEV minnətdarlığını bildirərək dedi:

-Təşəkkür edirəm. Mən sizi Gəncə Şəhər günü münasibətilə ürəkdən təbrik etmək istəyirəm. Dünən, bu gün Gəncədə bayramdır. Bu gözəl bayram bütün şəhər sakinləri üçün də çox xoş bir hadisədir. Biz bu bayramı iki il bundan əvvəl qeyd eləməyə başlamışıq və artıq gözəl ənənəyə çevrilibdir. Siz dediyiniz kimi, qədim Gəncə müasirləşir, gəncləşir, yeniləşir, çox böyük abadlıq işləri aparılır, böyük sosial əhəmiyyətli obyektlər tikilir.

Mən bu gün Müalicə-Diaqnostika Mərkəzinin açılışında iştirak etmişəm. Üç il bundan əvvəl o gözəl binanın təməli qoyulmuşdu. Bu gün isə Gəncədə ən müasir standartlara cavab verən Müalicə-Diaqnostika Mərkəzi fəaliyyətdədir. Orada quraşdırılmış avadanlıq dünyanın ən yüksək standartlarına uyğundur. Orada hər şey - ən qabaqcıl tibbi avadanlıq, ləvazimat var və ən yüksək tibbi xidmət göstəriləcəkdir.

Bu meydan da gözəlləşibdir. Yeni binalar, yeni küçələr salınır. Gəncə çox dolğun həyat sürür. Belə də olmalıdır. Qədim şəhərdir, Azərbaycan tarixində çox böyük rolu olmuşdur, bu gün də var. Mən istəyirəm ki, burada bütün işlər çox yüksək səviyyədə aparılsın. Biz bunu görürük, siz gəncəlilər də bunu gündəlik həyatda görürsünüz. Həm iqtisadi, həm də sosial məsələlər həll olunur, sənaye müəssisələri, məktəblər, xəstəxanalar tikilir, şəhər təsərrüfatı üçün lazım olan bütün tədbirlər görülmüşdür. Şəhər daha da gözəlləşir.

Mən son illər ərzində bir neçə dəfə Gəncədə olmuşam. Hər dəfə burada yenilikləri görəndə ürəyim sevinir. Əminəm ki, bu, sizi də sevindirir və Gəncənin sakinləri kimi siz də şəhərin inkişafı üçün böyük əmək sərf edirsiniz. Yəni bu, bizim hamımızın işidir. Hər bir rayonun, hər bir şəhərin gözəlləşməsi, abadlaşması, ilk növbədə, orada yaşayan sakinlərin əməyidir. İndi Azərbaycanda çox böyük quruculuq işləri aparılır. Əlbəttə ki, düzgün qərarlar verilir, proqramlar tərtib olunur. Amma o proqramları icra edən bölgələrdə yaşayan insanlardır, yerli icra hakimiyyəti orqanlarıdır, fəallardır, adi vətəndaşlardır. Onların fəaliyyəti olmasa, heç bir proqramı icra etmək mümkün olmayacaqdır. Bütün o proqramlar kağız üzərində qalacaqdır. Azərbaycanda isə bütövlükdə gözəl ab-haba hökm sürür və düzgün qərarlar, onların vaxtlı-vaxtında icrası və bütün fəalların bu işlərdə iştirakı, bax, sizin üçün belə gözəl şərait yaradır.

Ölkə inkişaf edir, irəliyə gedir, iqtisadi, siyasi gücünü artırır. Artıq bu, heç kimə sirr deyil, hamı bunu etiraf edir ki, Azərbaycan bölgədə aparıcı ölkədir. Bizim siyasi çəkimiz artır. Bu bölgədə gedən proseslərə təsir imkanlarımız artır. Biz yeni təşəbbüslər - iqtisadi, regional, siyasi xarakter daşıyan təşəbbüslər irəli sürürük. Azərbaycan dünya miqyasında çox böyük hörmətə malik olan ölkə kimi artıq öz yerini tutubdur. Artıq hamı bununla hesablaşmağa məcburdur.

Biz isə istəyirik ki, öz müstəqil həyatımızı yaşayaq, öz müstəqilliyimizi möhkəmləndirək. Azərbaycanda insanların yaşayış səviyyəsi artsın, onlar sabitlik, təhlükəsizlik şəraitində yaşasınlar. Belə olan halda, istənilən məsələ öz həllini tapacaqdır. Harada sabitlik, təhlükəsizlik var, orada inkişaf da olur. Biz bu inkişafı bütün bölgələrimizin timsalında görürük. Bax, mən bu gün səhər Qazaxda idim, orada Müalicə-Diaqnostika Mərkəzinin açılışında iştirak edirdim. Ondan sonra Ağstafa rayonunda böyük tikiş fabriki açıldı. Min nəfər işçisi olan fabrikdir. Bu, hər bir böyük ölkə üçün çox önəmli sənaye obyektidir. Ondan sonra Tovuz rayonunda gedən abadlıq-quruculuq işləri ilə tanış olmuşam. Orada da böyük işlər görülür. İndi Gəncədəyəm, sonra başqa yerlərdə olacağam. İnfrastruktur obyektləri, sosial məsələlərin həlli, yeni sənaye müəssisələri, sahibkarlığın inkişafı - bu, hər bir yerdə var. Beləliklə, Azərbaycanın bölgələrinin canlanması prosesi gedir.

Beş il bundan əvvəl bu proqrama başlamışıq. Regionların sosial-iqtisadi inkişafı Dövlət proqramı 2004-cü ilin əvvəlində qəbul edilmişdir və uğurla başa çatır. Orada nəzərdə tutulmuş bütün maddələr və nəzərdə tutulmamış məsələlərin böyük əksəriyyəti həll olundu. Biz növbəti illərə də, necə deyərlər, eyni yanaşma ilə gedirik. Hər bir bölgə, şəhər, rayon üzrə xüsusi fəaliyyət planı hazırlamışıq və bu plan əsasında irəliyə gedəcəyik.

Mən çox şadam ki, Azərbaycanın qədim şəhəri olan, ikinci şəhəri Gəncə öz çiçəklənmə dövrünü yaşayır. Əminəm ki, bundan sonra Gəncənin, bu gözəl şəhərin inkişafında həm siz fəal iştirak edəcəksiniz, həm də mən öz səylərimi göstərəcəyəm. Bu müştərək səylər hesabına Gəncə daha da gözəlləşəcəkdir. Artıq deyə bilərəm ki, Gəncə regional müstəvidə öz yerini tutan bir şəhərdir. Burada istənilən regional paytaxta xas olan bütün şərait var. Bəlkə bəzi hallarda daha da yuxarı səviyyədədir. Ən müasir aeroport var, Bakıdan sonra ikinci aeroportdur. Ən müasir Müalicə-Diaqnostika Mərkəzi var, heç inkişaf etmiş ölkələrdə belə şərait yoxdur. Ən gözəl yollar, xüsusilə Bakı-Gəncə yolu tikilir. Mən gedib inşaat işlərinə baxacağam. Ən yaxşı tibb müəssisələri, təhsil ocaqları var, parklar, xiyabanlar salınır, yeni binalar, yaşayış binaları tikilir. Bakıdan sonra ilk dəfə belə bina Gəncədə tikilir. Bu, nəyi göstərir?! Bu, onu göstərir ki, burada insanların imkanı var ki, o mənzillərdə yaşasın. Belə inkişaf sürətlə gedəcəkdir.

Mən bilirəm ki, müxtəlif banklar, müxtəlif beynəlxalq şirkətlər Gəncədə öz filiallarını açmaq istəyirlər. Məşhur olan ticarət zəncirləri Gəncəyə gəlmək istəyir. Aeroport yolunda yeni müasir ticarət mərkəzləri tikilir. Bütün bu işlər müasir xarakter daşıyır. Əlbəttə, Azərbaycanın bütün inkişaf əlamətlərini izah etmək üçün çox vaxt gedər. Əsas belə demək olar ki, öz tarixi köklərimizə əsaslanaraq müasirliyə doğru gedirik. Azərbaycanın timsalında müasirlik o demək deyil ki, biz öz keçmişimizi unudaq, ancaq hansısa müasir təcrübəni tətbiq edək. Biz o təcrübəni tətbiq etməliyik ki, milli adət-ənənəmizə uyğun olsun. Bizim mənəvi dəyərlərimizə uyğun olsun. Öz mənliyimizi, tarixi keçmişimizi saxlamaqla ən mütərəqqi, bizə uyğun beynəlxalq təcrübəni gətirməliyik və bunu edirik. Mən əminəm ki, gələcək illərdə bütün istədiyimizə nail olacağıq.

Sizi bu gözəl bayram münasibətilə, həm də qarşıdan gələn Ramazan bayramı münasibətilə bir daha təbrik etmək istəyirəm. Arzu edirəm ki, Gəncə həmişə olduğu kimi, gözəl şəhər kimi qalsın və inkişaf etsin.

Sağ olun.

X X X

Prezident İlham Əliyev Gəncəyə səfərinin sonunda Nizami Gəncəvinin məqbərəsini ziyarət edərək, gül dəstəsi qoydu.

######