ŞƏHİD AİLƏSİNİN ÜZVÜ, VALİDEYN FİRUZƏ ABBASOVANIN ÇIXIŞI
- Cənab Prezidentimiz!
Bütün şəhid ailələri adından bu müqəddəs elm ocağına “Xoş gəlmişsiniz!” deyirəm. Şəhid ailəsi kimi biz Sizin qayğınızı, isti nəfəsinizi, mərhəmətinizi daim öz üzərimizdə hiss edirik.
Mənim həyat yoldaşım 1992-ci ildə Ukraynanın Kiyev şəhərində ali təhsilini yarımçıq qoyaraq, ölkəmizin ərazi bütövlüyü uğrunda gedən döyüşlərdə iştirak etmişdir. 1994-cü ildə Ağdam ərazisində ağır döyüşlərin birində qəhrəmancasına şəhid olmuşdur. Buna görə də mənim ailəm müharibənin ağrı-acısını yaxşı bilir.
Biz istəmirik ki, bir daha qan tökülsün. Lakin buna baxmayaraq, radikal müxalifətçilər küçə və meydanlarda populist çıxışlar edərək, müharibənin təkrarlanmasını istəyirlər. Biz isə sülh danışıqlarının tükənmədiyi bir vaxtda bu cür fikir söyləyənlərin hərəkətini qəti surətdə pisləyirik.
Möhtərəm Prezident!
Biz işğal edilmiş torpaqlarımızın azad olunması istiqamətində Sizin həyata keçirdiyiniz tədbirləri dəstəkləyirik. Əgər sülh yolu ilə buna nail olmasaq, müharibənin başlayacağı təqdirdə yeganə oğlumu da döyüşə göndərməyə hazıram.
Mənim oğlum da ulu öndərimizin adını daşıyan bu məktəbdə oxuyur. Müasir standartlara uyğun, hər cür şəraiti olan, yüksək təlim-tərbiyə verən bu məktəbin fəaliyyəti də Sizin müdrik siyasətinizin, gələcək nəslə, təhsilə qayğınızın təzahürüdür.
Bəli, yaxşı atanın yaxşı oğlu olar. Atalar yaxşı deyib: “Ot kökü üstə bitər”. Həqiqətən də, Siz Heydər Əlirza oğlu Əliyevin adına layiq bir oğulsunuz. Həqiqətən də, Siz Heydər Əliyevin işlərinin layiqli davamçısısınız:
Əllər əyri olsa, yollar düzəlməz,
Düz yollar çəkməyə düz əllər gərək!
Bəli, Azərbaycan xalqı düz əllərdədir, düz yoldadır. Bu düz yolda Tanrı Sizə yardımçı olsun! Tanrı Sizi qorusun!
X X X
Azərbaycan Prezidenti İlham Əliyev mərasimdə nitq söylədi.
(Dövlətimizin başçısının nitqi qəzetin bugünkü nömrəsinin birinci səhifəsində dərc olunur).
X X X
Azərbaycanın dövlət himni əzəmətlə səsləndirildi, dərs ilinin başlandığını bildirən ilk zəng çalındı.
Prezident İlham Əliyev ümummilli liderimiz Heydər Əliyevin adını daşıyan liseyin şagirdlərinin əl işlərinə baxdı, sinif otaqları, müasir avadanlıqla təchiz edilmiş fizika, kimya, biologiya, ingilis dili və linqafon kabinetləri, yeməkxana, idman, akt salonları, tibb otağı, kitabxana, yeməkxana ilə tanış oldu, ayrı-ayrı fənlər üzrə tədris prosesini izlədi, dərsliklərlə maraqlandı. Məlumat verildi ki, lisey dərsliklərlə pulsuz tam təmin olunmuşdur. Şagirdlər Prezidenti salamladılar, dövlətimizin başçısı ilə ingilis dilində söhbət etdilər.
Liseyin VI b sinif şagirdi Əli Məmmədov respublikamızın rəhbərinə müraciətlə dedi:
- Əziz və hörmətli Prezidentimiz!
Gənc respublikamızın təməli müdrik rəhbərimizin xeyir-duası ilə qoyulmuşdur. İndi isə respublikamıza gənclik üçün əlindən gələni əsirgəməyən hörmətli Prezidentimiz cənab İlham Əliyev rəhbərlik edir. O, el ağsaqqalı, sevimli, əziz babamız olan Heydər Əliyevin layiqli davamçısı, bizə, böyüməkdə olan gənc nəslə işıqlı yol açan hörmətli Prezidentimizdir. Heydər Əliyev Azərbaycanın tarixi, İlham Əliyev bu tarixin davamçısıdır!
Bu geniş, işıqlı məktəbi bizə bəxş etdiyinizə görə Sizə bütün şagirdlər adından dərin minnətdarlığımızı bildirir, “Çox sağ olun!” deyirik!
Liseyimiz dahi liderimiz Heydər Əliyevin adını daşıyır. Bu adı şərəflə, ləyaqətlə qoruyub əla qiymətlərimizlə müəllimlərimizi, valideynlərimizi sevindirəcəyimizə və Azərbaycanımızın şöhrətini yüksəklərə qaldıracağımıza Sizin qarşınızda söz veririk. Arzu edirik ki, belə yeni təhsil ocaqlarının sayı getdikcə artsın.
X X X
Dövlətimizin başçısı liseydəki şəraiti yüksək qiymətləndirdi, ölkəmizdə, eləcə də Gürcüstanda yaşayan soydaşlarımızın dərsliklərlə təminatı ilə bağlı təhsil nazirinə müvafiq tapşırıqlar verdi, uşaqlara yaxşı oxumağı arzuladı, onlara dərslərində müvəffəqiyyətlər dilədi.
Prezident İlham Əliyev ümummilli liderimiz Heydər Əliyevin həyatını, ictimai-siyasi fəaliyyətini, təhsilə qayğısını və s. əks etdirən xüsusi guşəyə baxdı.
Dövlətimizin başçısına xatirə olaraq, liseyin maketi və birillik fəaliyyəti ilə bağlı fotoalbom təqdim edildi.
Prezident İlham Əliyev liseyin kollektivi ilə xatirə şəkli çəkdirdi.
X X X
Ətraf binaların mərasimə toplaşan sakinləri Prezidentə yaxınlaşaraq səmimi görüşdülər, ölkəmizdə aparılan quruculuq işlərinə, təhsilə göstərilən qayğıya görə ona təşəkkür etdilər.
Azərbaycan Prezidenti İlham Əliyev onların problemləri, qayğıları ilə maraqlandı, ərizə və şikayətlərinə ədalətli baxılacağını vurğuladı.
Bölmənin digər xəbərləri
