Şəhid anası: Büsatın bayrağa, Vətənə olan sevgisi sonsuz idi
Füzuli, 4 noyabr, Aydın Yavərzadə, AZƏRTAC
44 günlük Zəfər yürüşü zamanı düşmən tərəfinin illərdir möhkəmləndiyi cəbhə xəttinin yarılmasında canını fəda edən şəhidlərimizdən biri də Büsat Qurbanovdur. 20 yaşlı tankçı Büsat düşmən üzərinə hücuma keçən zaman açılan atəşə baxmayaraq dayanmayıb və düşmən səddinin yarılaraq döyüş yolunun açılmasında şücaəti ilə seçilib və həmin döyüşdə də şəhid olub.
AZƏRTAC-ın bölgə müxbiri Büsat Qurbanovun valideynləri ilə həmsöhbət olub, Büsat haqqında xatirələri qələmə alıb.
İndi onun yaşadığı evdə bir otaq ayrılıb. Bu otaq hər bir ziyarətçiyə Büsatın yarımçıq qalmış arzularından, xatirələrindən söz açır. Həmin otağa daxil olanda 20 yaşlı şəhidin Vətən sevgisinin necə tükənməz olduğu hiss edilir. Qurbanov Büsat Əfsər oğlu 2000-cı ildə Füzuli rayonunun Aşağı Kürdmahmudlu kəndində dünyaya göz açıb. Büsat orta məktəb illərində də vətənpərvərliyi ilə seçilib. Ruh yüksəkliyi ilə hərbi xidmətə yollanıb, daha sonra isə müddətdən artıq həqiqi hərbi xidmətçi kimi Vətən keşiyində dayanıb.
Şəhid atası Əfsər Qurbanov oğlu Büsatın qısa və şərəfli həyat yolundan qürurla danışır. "Büsat orta məktəbi bitirdikdən sonra 2018-ci ildə həqiqi hərbi xidmətə yollandı və layiqincə Vətən keşiyində dayanaraq xidmətini başa vurdu.
Büsat Vətənə, bayrağa bağlı idi ona görə də xidməti başa vurandan sonra yenidən ordu sıralarına qayıtmaq istəyirdi. O, bu istəyini mənə bildirdi və icazə istədi ki, müddətdən artıq hərbi qulluqçu olaraq Vətən keşiyində dayansın. Onun istəyinə mane olmadım. Büsatın sanki ən böyük arzusu gerçəkləşmişdi, tankçı olaraq xidmətə başladı. Sentyabrın 27-də düşmənin təxribatına qarşı ordumuz tərəfindən başlanan əks hücumda Büsat da tankçı olaraq ilk döyüşdə iştirak etdi. Ön cəbhənin yarılmasında Büsat xüsusi şücaəti ilə seçilənlərdən oldu. Onun Vətən sevgisi o qədər güclü idi ki, son damla qanına qədər döyüşdü və qarşıya qoyulan tapşırığı icra edərək şəhid oldu. Bu gün Büsat kimi şəhidimizin qanı-canı bahasına azad olunan torpaqlarımız artıq azaddır və şəhidlərimizin xatirəsi və qəhrəmanlığı əbədi olaraq yaddaşlarda qalacaq. Ali Baş Komandan İlham Əliyevin rəhbərliyi ilə qüdrətli Azərbaycan ordusu hərb meydanında sözün əsl mənasında tarix yazdı. Allah Bütün şəhidlərimizə rəhmət etsin, qazilərimizə şəfa versin”.
Şəhid anası Lətafət Quliyeva deyir ki, Büsat şəhadəti ilə evdən yox, eldən gedən qəhrəmana çevrilib "O, uşaqlıdan Vətənə, bayrağa, millətə bağlı bir övlad idi. Büsatın aprel döyüşlərində hələ 16 yaşı var idi, həmin qələbə vaxtı kəndimizin yaxınlığındakı yüksəkliyə bayraq sancdı, həmin bayraq bu gün də orda dalğalanır. Büsatın bayrağa, Vətənə olan sevgisi sonsuz idi. Hərbiyə də öz istəyi ilə yazılmışdı, Vətən uğrunda da canını fəda edərək şəhidlik məqamına ucaldı. Bu gün Büsat və digər şəhidlərimizin ruhu şaddır, çünki illərin həsrətinə son qoydular, torpaqlarımızın azadlığı uğrunda canlarını fəda etdilər. Onlar həm də gələcək nəsillərə məktəb oldular. Şəhidlərimiz ölməzlik qazanan qəhrəmandırlar və hər zaman xatırlanacaqlar.
Qeyd edək ki, Qurbanov Büsat Əfsər oğlu döyüşlərdə göstərdiyi şücaətə görə, "Vətən uğrunda", Cəsur döyüşçü" və “Füzulinin azad olunmasına görə” medalları ilə təltif edilib
Bölmənin digər xəbərləri
