Şəhidin həyat yoldaşı: Fəxr edirəm ki, seçilmiş bir insanın xanımıyam
Həyat yoldaşı şəhid Fariz Həsənova “Sevən qəlbin fəryadı” adlı kitab həsr edib
Bakı, 13 oktyabr, AZƏRTAC
O, bu dünyada cəmi 33 il ömür sürdü. Onun son 8 ilini bir yerdə yaşamışıq. Fariz gözəl ailə başçısı, qayğıkeş ata idi. Onun şəhid olduğunu yuxumda görmüşdüm. İnana bilmirdim. Hətta yuxuda onu da görmüşdüm ki, onun tabutunu həyətə gətiriblər və mən tabutu açanda ayağa qalxaraq deyir ki, mənimlə zarafat edir.
Bu sözləri şəhid Fariz Həsənovun həyat yoldaşı Əzizə xanım söyləyib.
O, AZƏRTAC-ın müxbiri ilə söhbət zamanı deyib ki, tale onları çox ağır günlərdə qarşılaşdırıb: “Evin tək övladı idim. Anam, 2 il sonra isə atam vəfat etdi. Doğma adamların itkisindən sonra özümü tək-tənha, köməksiz hiss etdiyim vaxt onunla tanış olduq. Farizin dostu mənim rəfiqəmlə evli idi. Dostlarımızın vasitəçiliyi ilə tanış olduq və sonra evləndik. 8 il bir yerdə ailə həyatı yaşadıq. Dünyaya 1 oğlumuz, 1 qızımız gəldi – Ruslan və Sevinc. Fariz şəhidlik zirvəsinə ucalandan sonra onlar məni həyata bağladılar. Düşündüm ki, uşaqlarım üçün güclü olmalıyam. Onun yadigarlarını atalarına layiq şəkildə böyütməliyəm. Mənim bütün ömrüm ona həsr olunub. Hər addımımda, anımda onu yanımda hiss edirəm. Fariz mənə indi də sağlığında olduğu qədər güc, ruh verir. Şəhidin xanımı olaraq fəxr edirəm. Fəxr edirəm ki, seçilmiş bir insanın həyat yoldaşıyam”.
Əzizə xanım Farizin 2016-cı ilin Aprel döyüşlərində də iştirak etdiyini bildirir: “Həmin döyüşlərdə göstərdiyi şücaətə görə fəxri fərman və medallarla təltif olunmuşdu. Döyüş yoldaşları onun cəsur bir insan olduğunu deyirdilər. Fariz həm həyat yoldaşı, həm də ata kimi çox həssas, ürəyiyumşaq insan idi”.
Fariz Şahin oğlu Həsənov 1987-ci il fevralın 12-də Ağstafa rayonunun Dağ Kəsəmən kəndində anadan olub. Həmin kənddəki 1 nömrəli tam orta məktəbi bitirib. 2005-2006-cı illərdə Xüsusi Dövlət Mühafizə Xidmətinin Milli Qvardiyası sıralarında müddətli həqiqi hərbi xidmətdə olub. 2008-ci ildə isə müddətdən artıq həqiqi hərbi xidmət hərbi qulluqçusu kimi ordu sıralarına qayıdıb.
2020-ci ilin Vətən müharibəsində döyüşlərdə igidlik göstərib. Oktyabrın 13-də Füzuli istiqamətində gedən döyüşdə şəhid olub. Doğulduğu Dağ Kəsəmən kəndində torpağa tapşırılıb.
Əzizə Həsənova ötən il Odlar Yurdu Universitetinin İqtisadiyyat və idarəetmə fakültəsinin mühasibat uçotu və audit ixtisasını bitirib. “Şəhid xanımı olaraq həm sevincli, həm də kədərliyəm. Məzun olarkən hər kəs sevinir. Kədərli olmağımın səbəbi isə Farizin bu sevincimi görməməsidir. O, ali təhsil almağımı və təhsili övladlarıma aşılamağımı çox istəyirdi. Həm də təəssüf edirəm ki, Fariz övladlarını, övladlarım isə atalarını doyunca görə bilmədilər. Ancaq əlimdən gələni edəcəyəm ki, onlar atasızlığı hiss etməsinlər, həyatda çətinliklə, məhrumiyyətlərlə üzləşməsinlər”.
Əzizə xanım 3 il əvvəl işıq üzü görən “Sevən qəlbin fəryadı” adlı kitabını da həyat yoldaşı Farizə həsr edib. Romanda müharibənin yaratdığı məhrumiyyətlər, eyni zamanda, Qələbədən doğan qürur, vətənpərvərlik ruhunun gənclərə aşılanması, ailə və milli-mənəvi dəyərlər, ən əsası, bir şəhid xanımının bu ağır iztirablara rəğmən ayaqda dura bilməsinin vacibliyi və mümkünlüyü vurğulanıb.
Müəllif kitab barədə deyir: “Mən sadə, qapalı bir həyat keçirmişəm. Nə vaxtsa kitab yazacağım heç ağlıma da gəlməzdi. Fariz həmişə deyərdi ki, ömrümüzdən keçən gözəl xatirələri yaz saxla, vaxt gələr balalarımız oxuyarlar. Elə bilirəm ki, onunla 8 il yox, 80 il bir yerdə yaşamışam. Onunla bağlı o qədər xatirələr, əhvalatlar var ki… Fariz şəhid olandan sonra dedikləri yadıma düşdü. Fikirləşdim ki, mən onun arzusunu həyata keçirməliyəm. “Sevən qəlbin fəryadı” kitabını yazmaqla onun vəsiyyətini yerinə yetirmiş oldum. Mənim üçün çox qürurvericidir ki, təəssüratlarımı, hiss və duyğularımı, ən əsası, sevgimi həkk etdiyim kitabı oxucularla bölüşdüm. Kaş ki, onun ömür yolunu əks etdirən film də çəkiləydi...”.
Fariz Həsənov tank əleyhinə idarəolunan raketlə döyüşürdü. Döyüş yoldaşlarının bildirdiyinə görə, onun idarə etdiyi raketdən açılan atəşlə nəticəsində çox sayda erməni hərbçiləri məhv edilib. O, ölümündən sonra 3-cü dərəcəli “Vətənə xidmətə görə” ordeni, “Vətən uğrunda”, “Döyüşdə fərqlənməyə görə” və “Füzulinin azad olunmasına görə” medalları ilə təltif olunub.
Bölmənin digər xəbərləri
