SƏHİYYƏ NAZİRLİYİNİN GENİŞ KOLLEGİYA İCLASINDA DOQQUZ AYIN YEKUNLARI MÜZAKİRƏ OLUNMUŞDUR
Səhiyyə naziri Oqtay Şirəliyev kollegiya iclasını açaraq, Azərbaycan Prezidenti İlham Əliyevin dövlətimizə başçılıq etməsindən ötən üç il ərzində görülmüş işləri konkret faktlarla diqqətə çatdırdı, səhiyyə sahəsində həyata keçirilən islahatlardan danışdı. Nazir bildirdi ki, ölkəmizin rəhbəri İlham Əliyevin diqqət və qayğısı sayəsində səhiyyə sahəsinin inkişafına yönəldilən büdcə vəsaitinin məbləği 4 dəfə artırılmışdır.
Vaxtilə səhiyyəmizin maddi-texniki bazasının ağır vəziyyətdə olduğunu xatırladan nazir demişdir ki, indi bu sahədə mühüm tədbirlər həyata keçirilir. Şişirdilmiş ştat cədvəlləri ləğv edilmiş, dərman sahəsinə birbaşa nəzarət edən İnnovasiya və Təchizat Mərkəzi yaradılmış və digər struktur dəyişiklikləri aparılmışdır.
Nazir demişdir ki, əhali hələ də pullu və pulsuz səhiyyə xidmətləri barədə kifayət qədər geniş məlumata malik deyildir. Halbuki Respublika kliniki xəstəxanası, Qarayev adına 2 nömrəli uşaq xəstəxanası və kliniki tibbi mərkəz bu gün şəhər və rayon əhalisinə tam pulsuz xidmət göstərir. Nazirlər Kabineti ilə Tarif (qiymət) Şurası səhiyyə sistemində pullu xidmətlərin qiymətlərini müəyyənləşdirmək üzərində işləyir və tezliklə əhalinin yaşayış səviyyəsi nəzərə alınmaqla həmin tariflər təqdim ediləcəkdir.
Təcili və təxirəsalınmaz tibbi yardım xidmətində mövcud olan problemlərdən söz açan nazir vurğuladı ki, hazırda bu xidmətin yüksək səviyyədə fəaliyyəti, xəstələrin, həkimlərin uzaq ünvanlara vaxtında çatdırılması üçün bir sıra məşhur şirkətlər, eləcə də “Azərbaycan Hava Yolları” Dövlət Konserni ilə danışıqlar aparılır və nəzərdə tutulan layihələrin gələn ildən həyata keçirilməsinə başlanacaqdır. Nazir xüsusi vurğuladı ki, Azərbaycan Prezidentinin tapşırığı ilə 12 rayonda hər cür şəraiti olan təcili tibbi yardım məntəqəsi açılmışdır.
Sosialyönümlü xəstəliklərə dair qəbul olunan 9 Dövlət Proqramı (xroniki böyrək çatışmazlığı, şəkərli diabet, hemofiliya və talassemiyalı irsi qan xəstəlikləri, ana və uşaqların qorunması, elektron sağlamlıq kartı, onkoloji xəstələrin şiş əleyhinə əsas preparatlarla təminatı, yoluxucu xəstəliklərin immunoprofilaktikası, qanın və qan komponentlərinin donorluğu və qan xidmətinin inkişafı, tibbi müayinə kartı) haqqında ətraflı məlumat verən Oqtay Şirəliyev dedi ki, əvvəlki illərdən fərqli olaraq indən belə bu proqramlarla bağlı ayrılan büdcə vəsaitindən sırf təyinatı üzrə istifadə olunacaqdır.
Hazırda ilk dəfə olaraq hemofiliya və talassemiyalı xəstələrin dövlət tərəfindən dərman preparatları ilə pulsuz təmin edildiyini diqqətə çatdıran nazir bildirmişdir ki, bu qayda gələn ildən onkoloji xəstələrə də şamil ediləcəkdir. Xroniki böyrək çatışmazlığı olan xəstələr üçün açılan yeni mərkəzlərdə 600-dən çox xəstə də dövlət büdcəsindən ayrılan vəsait hesabına müalicə edilir.
Doğum evlərində vəziyyətin müasir tələblərə cavab vermədiyini söyləyən nazir qeyd etdi ki, yaxın vaxtlarda bütün doğum evləri müasir avadanlıqla təmin ediləcəkdir. Hazırda sağlamlıq kartları üzərində intensiv iş gedir və Nazirlər Kabineti tərəfindən qəbul olunmuş proqram əsasında gələn ildən hər yeni doğulan uşağa sağlamlıq kartı veriləcəkdir.
Əhalinin immunoprofilaktikasından danışan nazir Azərbaycan Prezidentinin tapşırığı ilə respublikada məxmərək və qızılca xəstəliklərinin profilaktikasına dair Dövlət Proqramının uğurla icra edildiyini, İnnovasiya və Təchizat Mərkəzi tərəfindən apteklərdə saxta dərmanlarla bağlı yoxlamalar keçirildiyini, dərman reklamının qanunla tənzimlənməsi üçün ciddi tədbirlər görüldüyünü diqqətə çatdırdı.
Beynəlxalq qurumlarla nazirliyin əlaqələrinin genişləndirilməsi sahəsində görülən işləri vurğulayan O.Şirəliyev qeyd etdi ki, hazırda YUNİCEF, USAİD və digər mötəbər qurumlar Azərbaycan səhiyyəsinin inkişafına çox böyük maraq göstərirlər. Nazirlik Dünya Bankı ilə birgə “Səhiyyədə islahatlar” layihəsini həyata keçirir.
İcraiyyə Komitəsinin vitse-prezidenti olduğu Dünya Səhiyyə Təşkilatının baş direktoru vəzifəsinə bu ay seçkilər keçiriləcəyini xatırladan nazir vurğulandı ki, həmin vəzifəyə namizədlərin Azərbaycana gəlmələri və ölkəmizdən dəstək almaq arzusunda olmaları respublikamızın nüfuzunun gündən-günə artdığını sübut edən əsas amillərdən biridir.
Sonra məruzə ətrafında çıxışlar oldu. Nazir müavini Elsevər Ağayev səhiyyə ocaqlarında aparılan təmir və tikinti işlərindən, tibbi yardımın təşkili şöbəsinin müdiri Şahnaz Baxşəliyeva nazirliyə daxil olmuş şikayətlər, xəstələrin xarici ölkələrdə müalicəsi ilə bağlı görülən təbbirlərdən, Bakı Baş Səhiyyə İdarəsinin rəisi Leyla Seyidbəyova şəhərin müalicə ocaqlarında yol verilən nöqsanlardan, onların aradan qaldırılmasına yönəldilən islahatlardan, kadrlar, elm və təhsil şöbəsinin baş məsləhətçisi Naibə Əzizova kadrların qarşısında duran vəzifələrdən, sanitariya və epidemiologiya nəzarəti sektorunun müdiri Viktor Qasımov yoluxucu xəstəliklərə, eləcə də “quş qripi”nə qarşı aparılan profilaktik tədbirlərdən danışdılar.
Bölmənin digər xəbərləri
