ŞƏKİDƏ PREZİDENT SƏRƏNCAMINDAN İRƏLİ GƏLƏN VƏZİFƏLƏR GENİŞ MÜZAKİRƏ OLUNMUŞDUR
AZƏRTAC-ın müxbiri xəbər verir ki, müşavirəni giriş sözü ilə açan Şəki Şəhər İcra Hakimiyyətinin başçısı Nazim İbrahimov Prezident İlham Əliyevin bu yaxınlarda Azərbaycanın şimal-qərb bölgəsinə səfəri çərçivəsində Şəkidə keçirdiyi tarixi görüşləri bir daha xatırlatmış, şəkililərin bundan sonra da Prezidentə və dövlətçiliyimizə dair sadiq qalacağını vurğulamışdır.
Müşavirədə Şəkinin sosial-iqtisadi inkişafı ilə bağlı görülən tədbirlər barədə geniş məruzə ilə çıxış edən icra hakimiyyəti başçısının müavini Firon Əliyev 2006-2008-ci illərdə həyata keçirilməsi nəzərdə tutulan əlavə tədbirlər planında 19 bəndin bilavasitə Şəkinin sosial-iqtisadi inkişafı ilə bağlı olduğunu, bu tədbirlərin icrası üçün dövlət büdcəsindən, habelə icraya məsul strukturların öz vəsaiti və digər mənbələr hesabına 11 milyon 714 min manat vəsait ayrılacağını xatırlatmışdır. Bildirilmişdir ki, tədbirlər planında nəzərdə tutulanların uğurla icrası qısa müddət ərzində Şəkinin şöhrətini və iqtisadi imkanlarını artıracaq, insanların həyat səviyyəsini yaxşılaşdıracaqdır.
Çıxışlardan sonra Şəkidə aparılan tikinti, quruculuq və abadlıq işlərində fərqlənənlərə şəhər icra hakimiyyətinin fəxri fərmanları təqdim edilmişdir.
Müşavirə iştirakçıları adından Azərbaycan Prezidenti İlham Əliyevə müraciət qəbul olunmuşdur.
Müraciətdə deyilir:
“Əziz və möhtərəm Prezidentimiz!
Biz dövlətimizin və xalqımızın həyatının böyük ictimai-siyasi, sosial-iqtisadi və mədəni hadisələrlə zəngin olduğu bir dövrdə Sizə müraciət edirik.
Siz ümummilli liderimiz Heydər Əliyevin cəmiyyətə siyasi xəttini uğurla davam və inkişaf etdirir, müstəqil Azərbaycan Respublikasının möhkəmlənməsi, dünya dövlətləri arasında layiqli yer tutması, bütün dünya azərbaycanlılarının mənəvi dayağı, qürur və iftixarı olan bir dövlətə çevrilməsi üçün var qüvvənizlə çalışırsınız.
Ölkə rəhbəri kimi fəaliyyətə başladığınız gündən yürütdüyünüz uzaqgörən və məqsədyönlü siyasət nəticəsində respublika həyatının bütün sahələri günü-gündən inkişaf edir. Müstəqil dövlətçiliyini daha da möhkəmləndirən, Avratlantik məkana inteqrasiya xəttini uğurla davam etdirən, transmilli enerji və kommunikasiya layihələrinin lokomotivinə çevrilən, demokratikləşmə yolunda atdığı ardıcıl addımlarla Cənubi Qafqazın ən nüfuzlu ölkəsi kimi tanınan Azərbaycan ümumi daxili məhsul istehsalının artımına görə bu gün artıq dünyanın lider dövlətləri səviyyəsinə yüksəlmişdir.
Regionların sosial-iqtisadi inkişafına dair Dövlət Proqramının uğurla yerinə yetirilməsi nəticəsində indiyədək respublikamızda 380 mindən artıq yeni iş yeri açılmışdır.
Dövlət Proqramı respublikamızın hər yerində olduğu kimi, Şəkidə də uğurla yerinə yetirilir. Şəki xanları sarayının bərpası, istehsal gücü 16 milyon şərti banka olan konserv zavodunun, illik istehsal gücü 20 milyon ədəd olan kərpic zavodunun, “Şəki Şirələri İstehsal Kommersiya” MMC-nin, uzun illərdən bəri inşası yarımçıq qalmış İdman-sağlamlıq mərkəzinin, Əlillərin bərpa mərkəzinin, Şin çayı üzərində 164 metr uzunluğunda körpünün, Qarabağ müharibəsi əlilləri və şəhid ailələri üçün 8 mənzilli yaşayış binasının və onlarca digər obyektin tikintisi başa çatdırılaraq istifadəyə verilmişdir.
“Şəki-İpək” ASC-də istehsalın həcmi genişləndirilmiş, şəhərdə, kənd və qəsəbələrdə xeyli abadlıq işləri aparılmış, turizmin inkişafı ilə bağlı bir sıra layihələr həyata keçirilmiş, 87 meqavat gücündə yeni modul tipli istilik elektrik stansiyasının tikintisinə başlanılmış, əhalinin su, elektrik enerjisi və təbii qazla təminatı sahəsində irəliləyişə nail olunmuş, kənd təsərrüfatı məhsulları istehsalının əhəmiyyətli dərəcədə artımı təmin edilmişdir.
Cənab Prezident!
Sizin regionların sosial-iqtisadi inkişafı Dövlət Proqramının icrasına birbaşa nəzarət etmək məqsədi daşıyan səfərləriniz çərçivəsində bu yaxınlarda Azərbaycanın şimal-qərb bölgəsinə gəlməyiniz bizim üçün xüsusi əhəmiyyət kəsb edir. Aprelin 13-də şəhərimizdə keçirdiyiniz görüşlər zamanı söylədiyiniz hər bir söz, hər bir fikir, verdiyiniz tövsiyələr bizim üçün olduqca vacibdir, əhəmiyyətlidir. Sizin Şəki və şəkililər barədə söylədiyiniz dəyərli fikirlər, işimizə verdiyiniz yüksək qiymət bizi çox sevindirir, məsuliyyətimizi daha da artırır.
Sizin 2006-cı il 1 iyun tarixli Sərəncamınızla təsdiqlənmiş “Azərbaycan Respublikasının Şəki şəhərinin, Balakən, Qax və Zaqatala rayonlarının sosial-iqtisadi inkişafının sürətləndirilməsinə dair tədbirlər planı” rayon əhalisinin böyük sevincinə səbəb olmuşdur. İctimaiyyətin nümayəndələri ilə müzakirə edilərək, şəhər icra hakimiyyətinin təqdim etdiyi əksər təklifləri özündə ehtiva edən bu tədbirlər planının ayrı-ayrı maddələri uzun müddət əhalini narahat edən problemlərin həllini sürətləndirəcəkdir. Şəkinin infrastrukturunun yenidən qurulmasına, iqtisadiyyatının sürətli inkişaf etməsinə, insanların sosial-rifah halının yüksəldilməsinə xidmət göstərəcək tədbirlər planının uğurla icrasına şəkililər indidən səfərbərdirlər.
Cənab Prezident!
Siz həmişə Şəkiyə və şəkililərə böyük diqqət və qayğı ilə yanaşmısınız.
Biz şəkililər çalışacağıq ki, Sizin etimadınızı, həssas münasibətinizi öz fəaliyyətimizlə, yaxşı işimizlə doğruldaq.
Biz müstəqil, suveren Azərbaycanın vətəndaşları olmağımızla fəxr edir, gələcəyə böyük ümidlərlə baxırıq!
Cənab Prezident!
Doğma Azərbaycanımızın daha da qüdrətlənməsi, xalqımızın xoşbəxt gələcəyi naminə titanik fəaliyyətinizdə Sizə yeni-yeni uğurlar diləyirik”.
Bölmənin digər xəbərləri
