ŞƏMKİRİN KƏNDLƏRİNƏ MAVİ YANACAQ VERİLİR
Şəmkir rayonunda əhalinin mavi yanacaqla təminatı məqsədilə kompleks tədbirlər uğurla davam etdirilir. Təkçə keçən il aparılan yenidənqurma işləri nəticəsində Qarabağlar, Daşbulaq və Könüllü kəndlərinə mavi yanacağın nəqli bərpa edilmiş, 18 min 942 abonentin mənzilində sayğac quraşdırılmış, istehlak olunan qazın haqqının yığımı 100 faizə çatdırılmışdır.
Rayon qaz-istismar idarəsindən AZƏRTAC-ın müxbirinə demişlər ki, indi rayonda 1 şəhər, 4 qəsəbə və 13 kənd mavi yanacaqdan istifadə edir. Hazırda Qaracəmirli, Talış, Qasım İsmayılov, Qılıncbəyli, Dəllər Cəyir, Dəllər Cırdaxan, Dəllər Daşbulaq, Sarıtəpə və Qaranüy kəndlərində qaz təchizatını bərpa etmək məqsədilə yenidənqurma işləri uğurla aparılır. Kəndlərin qış mövsümünədək mavi yanacaqla təmin edilməsi üçün quraşdırıcılar işin sürətini xeyli artırmışlar.
