SEPAH Küveyt və Bəhreyn yaxınlığındakı tankerlərə zərbə endirməyə hazırlaşır
Bakı, 9 sentyabr, AZƏRTAC
İran İslam İnqilabı Keşikçiləri Korpusu (SEPAH) Küveyt və Bəhreyn yaxınlığında yerləşən neft tankerlərinin heyətlərini yaxınlaşan zərbələr səbəbindən gəmiləri dərhal tərk etməyə çağırıb.
AZƏRTAC xəbər verir ki, bu barədə IRIB telekanalı məlumat yayıb.
Məlumata görə, SEPAH-ın Hərbi Dəniz Qüvvələri zərbələrin ABŞ-nin İran tankerlərinə hücumlarına cavab olaraq həyata keçiriləcəyini bildirib. Qeyd olunub ki, lövbərdə olub-olmamasından asılı olmayaraq, Küveyt və Bəhreyn limanlarında yerləşən gəmilər hədəf olacaq.
Daha əvvəl “Tasnim” xəbər agentliyi ABŞ qüvvələrinin Xarq adası yaxınlığında İran neft tankerinə zərbə endirdiyini bildirmişdi.
Bundan əlavə, “Fars” xəbər agentliyinin məlumatına görə, Oman körfəzi sahilində yerləşən İranın Cask şəhəri yaxınlığında da partlayışlar baş verib. Partlayış səslərinin dənizdən eşidildiyi bildirilib.
Bölmənin digər xəbərləri
