Sərbəst güləş üzrə Azərbaycan millisi məsul yarışlara Qubada hazırlaşır
Bakı, 26 fevral, AZƏRTAC
Sərbəst güləş üzrə Azərbaycan millisi növbəti təlim-məşq toplanışına start verib.
Azərbaycan Güləş Federasiyasından AZƏRTAC-a verilən məlumata görə, yığma geniş tərkibdə Qubaya yollanıb.
Quba Olimpiya İdman Kompleksində təşkil edilən hazırlıq prosesi martın 10-dək davam edəcək. Təlim-məşq toplanışında böyüklərlə yanaşı, gənclərdən ibarət millinin üzvləri də yer alıb.
Baş məşqçi Xetaq Qazyumov, böyük məşqçi Cəbrayıl Həsənov, məşqçilər Taymuraz Kokoyevlə Şərif Şərifov, Oyan Nəzəriani, eləcə də U-20 milli komandanın böyük məşqçisi Arif Abdullayev, məşqçilər Rövşən Hacıyev, Nazim Əlicanov və Əşrəf Əliyevin rəhbərliyi altında 70-dən çox güləşçi həm fiziki, həm də taktiki-texniki çalışmalar üzərində məşq edəcək. ABŞ-dan dəvət edilmiş fiziki hazırlıq üzrə mütəxəssis Mark Alan Filippi də xüsusi fiziki hazırlıq üzrə təmrinlərin həyata keçirilməsində yaxından iştirak edəcək.
Hazırlıq prosesində Qazaxıstan, Rusiya və Belçikadan sınaqçı-rəqiblər (sparrinq) də yer alıb.
Qeyd edək ki, Quba toplanışı Bakıda keçiriləcək məsul yarışlara – Avropa Olimpiya Təsnifat turnirinə (5-7 aprel) və U-23 Avropa çempionatına (20-26 may) hazırlıq xarakteri daşıyır.
Bölmənin digər xəbərləri
